Shqipëria ka përqindjen më të lartë në Ballkanin Perëndimor të të anketuarve që shprehen të shqetësuar për koston e jetesës dhe inflacionin.
Sipas anketës “SecuriMeter 2026” të Këshillit të Bashkëpunimit Rajonal, 96.6 për qind e të anketuarve në Shqipëri shprehën shqetësim, kundrejt 83.4 për qind mesatarisht në gjashtë vendet e rajonit. Diferenca është 13.2 pikë përqindjeje.
Maqedonia e Veriut është vendi i vetëm që i afrohet Shqipërisë, me 93.8 për qind të të anketuarve që shprehin shqetësim. Në Bosnje Hercegovinë, përqindja zbret në 82 për qind, në Mal të Zi në 78.3 për qind dhe në Serbi në 76.3 për qind. Kosova ka përqindjen më të ulët në rajon, me 73.7 për qind, rreth 23 pikë përqindjeje më pak se Shqipëria.
Shqipëria kryeson edhe për intensitetin e shqetësimit. Në një shkallë nga 1 në 10, të anketuarit e vlerësuan shqetësimin për koston e jetesës dhe inflacionin me mesatarisht 9 pikë, kundrejt 8 pikëve në rajon. Për të llogaritur përqindjen e të shqetësuarve, anketa përfshiu përgjigjet nga 6 deri në 10 pikë.
Në vitin 2025, kur anketa pyeste veçmas për koston e jetesës dhe inflacionin, Shqipëria ishte mbi mesataren rajonale për të dy treguesit. Shqetësimi për koston e lartë të jetesës mori mesatarisht 8.79 pikë në Shqipëri, kundrejt 8.19 pikëve në rajon. Për inflacionin, vlerësimi ishte 8.45 pikë, kundrejt 8.12 pikëve në rajon. Bashkimi i dy çështjeve në një pyetje të vetme në vitin 2026 kufizon krahasimin e drejtpërdrejtë të pikëve.
Edhe në vitin 2024, kostoja e jetesës dhe inflacioni ishin problemi ekonomik më i përmendur në Shqipëri. Atëherë, 73 për qind i përfshinë ndër tri problemet kryesore ekonomike të vendit, kundrejt 77 për qind në rajon. Pyetja e atij viti u kërkonte të anketuarve të zgjidhnin tri probleme, ndërsa në vitin 2026 ata vlerësuan nivelin e shqetësimit për secilën çështje.
Përballimi i shpenzimeve të përditshme ndryshon ndjeshëm sipas zërit të buxhetit. Në Shqipëri, 50.6 për qind e të anketuarve thonë se mund ta mbajnë banesën mjaftueshëm të ngrohtë në dimër dhe të freskët në verë. Kjo është përqindja më e ulët në rajon, ku mesatarja arrin në 62.4 për qind. Vetëm 3.6 për qind shprehen kryesisht ose plotësisht të kënaqur me mundësinë për të gjetur një banesë ose qira të përballueshme, kundrejt 24.7 për qind në rajon./Monitor/