Serbi, Ambasadori i SHBA kërcënohet me vdekje 

Pas vizitës në Universitetin e Filozofisë në Novi Sad të Serbisë, në rrjetet sociale vërshuan kërcënimet me vdekje ndaj Amabsadorit të SHBA në Beograd, Christopher Hill, dhe profesorit të këtij universiteti, Dinko Gruhonjiç.

Sipas portalit “Autonomia” nga Novi Sadi, në rrjetet social shkruan “Plumb për të dytë“ dhe “Kunj murrizi për të dytë“, që ndër popullin serb besohet se ngulja e këtij kunji largon vampirët dhe shtrigat.

Fakulteti i Filozofisë në Novi Sad ka bërë të ditur se Ambasadori i Shteteve të Bashkuara, Christopher Hill, ka vizituar fakultetin dhe Departamentin për studimin e mediave, ku ka biseduar me dekanin Ivan Zhivançeviç Sekerush dhe zëvendsin e tij për marrëdhënie ndërkombëtare, Zoran Paunoviç, ku më pas ka vizituar dhe studion televizive multimediale, e cila u ndërtua me ndihmën e Ambasadës së SHBA, raporton e përdithsmja serbe Danas.

Me këtë rast Ambasadori Hill ka biseduar me pedagogët dhe studentët mbi situatën e lirisë së mediave në Serbi dhe kërcënimeve që marrin gazetarët, profesorët dhe studentët në Novi Sad.