SHBA dërgon një aeroplanmbajtëse tjetër në Lindjen e Mesme

SHBA do të dërgojë një aeroplanmbajtëse tjetër në Detin Arabik. Washingtoni vazhdon të ushtrojë presion ndaj regjimit iranian lidhur me programin e tij bërthamor.

SHBA-ja po përgatitet të dërgojë në Lindjen e Mesme një grup të dytë sulmues me aeroplanmbajtësen “USS Gerald R. Ford”, e cila do t’i bashkohet në Detin Arabik aeroplanmbajtëses “USS Abraham Lincoln”. Presidenti Donald Trump u tha Trump gazetarëve se “aeroplanmbajtësja do të niset shumë shpejt”, por pa dhënë një kohë të saktë.

Dërgimi i aeroplanmbajtëses dhe një grupi të dytë sulmues në rajon vjen pasi Trump paralajmëroi për “pasoja shumë të këqija” nëse Irani nuk arrin një marrëveshje me Uashingtonin për programin e tij bërthamor.

Aeroplanmbajtësja USS Gerald R. Ford është rikthyer para pak kohësh nga Karaibet, ku ishte vendosur që nga tetori 2025, kur SHBA-ja rriti praninë ushtarake në atë rajon para sulmit që çoi në kapjen e diktatorit venezuelan Nicolás Maduro.

Parlajmërim nga vendet arabe

Përfaqësues amerikanë dhe iranianë u takuan javën e kaluar për bisedime në Oman por nuk arritën ndonjë rezultat konkret lidhur me programin bërthamor të Teheranit.

Trumpi nuk e përjashton mundësinë e ndërhyrjes ushtarake, nëse Teherani nuk pranon ta kufizojë programin e tij bërthamor.

Vendet arabe të Gjirit Persik paralajmëruan se çdo sulm i SHBA-së ndaj Iranit mund të përshkallëzohet në një konflikt të ri rajonal.

Trump shpreson për një marrëveshje me Iranin

Gjatë mandatit të tij të parë, në vitin 2018, Trump e tërhoqi SHBA-në nga marrëveshja që parashikonte kufizimin e pasurimit të uraniumit nga Irani në këmbim të lehtësimit të sanksioneve.

Teherani pretendon se ambiciet e tij bërthamore janë paqësore. Megjithatë Agjencia Ndërkombëtare për Energjinë Atomike (IAEA) njoftoi vitin e kaluar se Irani ka pasuruar uranium përtej nivelit të nevojshëm për përdorim civil.

Irani e pezulloi bashkëpunimin me IAEA-n pasi SHBA bombardoi objekte bërthamore iraniane qershorin e vitit të kaluar, gjatë luftës 12-ditore të Izraelit kundër Republikës Islamike. Në atë kohë Trumpi deklaroi se sulmet kishin “shkatërruar plotësisht” objektet kryesore të pasurimit bërthamor të Iranit, megjithëse kjo nuk u konfirmua kurrë në mënyrë të pavarur.

Megjithë pretendimin se kapacitetet e Iranit për pasurimin e uraniumit janë shkatërruar, Trumpi thotë se dëshiron një marrëveshje të re bërthamore me Iranin./DW/