SHBA kushtëzon tërheqjen e trupave nga Siria
Shtetet e Bashkuara theksojnë se vendimi i saj për t’i tërhequr trupat nga Siria është kushtëzuar me atë që Turqia të ofrojë siguri për kurdët në Siri. Kështu u shpreh këshilltari për siguri kombëtare i SHBA-së, John Bolton.
Gjatë vizitës së tij në Izrael, Bolton po ashtu tha se tërheqja e SHBA-së është kushtëzuar edhe me mposhtjen e militantëve të mbetur të Shtetit Islamik në Siri, raporton RFE.
John Bolton është shprehur se nuk ka një afat të caktuar se kur SHBA-ja do të tërheqë trupat e saj nga Siria.
“Afati për tërheqjen e trupave varet nga vendimet politike që ne duhet të zbatojmë”, tha ai, duke shtuar se presidenti i Shteteve të Bashkuara, Donald Trump “dëshiron që kalifati i ISIS-it të shkatërrohet”.
Në një video-mesazh të postuar në Twitter më 20 dhjetor, 2018, Trump kishte thënë se trupat amerikane “po kthehen”.
“Ne kemi fituar kundër ISIS-it. Ne i kemi mposhtur”, kishte thënë ai.
Sekretari amerikan i Mbrojtjes, Jim Mattis kishte dhënë dorëheqje pas vendimit të Trumpit për tërheqjen e trupave, teksa aleatët e NATO-s – përfshirë Francën dhe Gjermaninë – kishin thënë se ndryshimi drastik i kursit të SHBA-së ka vënë në rrezik luftën kundër IS-it dhe po ashtu ka vënë në rrezik milicitë kurde, të cilët kanë punuar me forcat amerikane në luftën kundër militantëve të ISIS-it.
Komentet e John Boltonit janë të parat që konfirmojnë nga administrata amerikane se plani i tërheqjes së trupave është shtyrë, pasi që fillimisht mendohej se trupat do të tërhiqeshin brenda javësh.
