SHBA nis miliona vaksina drejt vendeve tjera

Shtëpia e Bardhë ka bërë të ditur se Shtetet e Bashkuara kanë nisur 22 milionë doza të vaksinës kundër koronavirusit në shtetet tjera këtë javë, teksa një sondazh ka treguar se shumica e amerikanëve të pavaksinuar, janë shprehur se nuk duan të imunizohen.

Të 22 milionë dozat janë dërguar në 23 shtete, tha zëdhënësja e Shtëpisë së Bardhë, Jen Psaki, raporton RFE, duke shtuar se deri në fund të javës, gati 80 milionë doza vaksinash do të dërgohen nga SHBA në vendet tjera.

Shtetet e Bashkuara “janë duke dhënë donacion më shumë vaksina sesa secili vend tjetër”, thotë Psaki, megjithatë, ende ekziston hapësirë e konsiderueshme në sasinë e vaksinave që kanë vendet e pasura kundrejt atyre që janë të varfra.

Sondazhin me personat e pavaksinuar në SHBA, e ka realizuar Associated Press dhe Qendra kërkimorë NORC.

Ato kanë gjetur se 35 për qind e të rriturve, që nuk kanë marrë vaksina, kanë thënë se me siguri nuk do ta bëjnë një gjë të tillë, dhe 45 për qind kanë thënë se janë të bindur që nuk do të imunizohen.

Shumica prej tyre janë shprehur se dyshojnë se vaksina funksionon kundër variantit Delta, pavarësisht të dhënave se vaksinat janë tejet efektive kundër tij.

Gjetjet kanë vënë në pah sfidat me të cilat përballet sistemi shëndetësor dhe Qeveria, teksa rritet numri i të infektuarave në gati të gjitha rajonet e SHBA-së.

Presidenti amerikan, Joe Biden, u ka bërë thirrje amerikanëve të vaksinohen, duke thënë se koronavirusi tani është pandemi në mesin e të pavaksinuarve.

Në nivel kombëtar, 56 për qind e popullsisë amerikane ka pranuar të paktën një dozë të vaksinës, sipas Qendrave për Kontrollin dhe Parandalimin e Sëmundjeve.

Varianti tejet ngjitës Delta, ka rritur numrin e të infektuarve me koronaviurus këtë javë në nivel global.

Numri total i të infektuarve ka rritur në 193 milionë, ndërsa i viktimave në 4.1 milionë.