Sheiku Mohamed bin Zajed mbështeti vrasjen e 8372 muslimanëve nga serbët! Vuçiç e falënderon

Rezoluta e propozuar nga Gjermania dhe Ruanda që u sponsorizua nga 30 shtete dhe u miratua në Asamblenë e Përgjithshme të Kombeve të Bashkuara duke shpall 11 korrikun Ditë Ndërkombëtare të Përkujtimit të Viktimave të Gjenocidit të Srebrenicës, dënon mohimin e gjenocidit dhe madhërimin e kriminelëve të luftës, përveç se la shije të keqe në botën e qytetëruar pse tempulli i kombeve të botës nuk e dënoi me unanimitet një gjenocid, tek ata që e shkaktuan këtë veprim mizor shkaktoi një entuziazëm të paparë, gjë që e shprehën gjatë gjithë natës me festime nëpër qytetet kryesore të Serbisë.

Ndonëse propozuesit e Rezolutës mund të jenë të kënaqur që ajo u miratua me 84 vota nga 171 shtete sa ishin në seancë, 19 ishin kundër dhe 68 abstenuan, efekti që dha kjo Rezolutë që në momentin e parë kur u mbyll procesi i votimit e bënë të turpërohet çdo njeri në këtë planet dhe jo vetëm Emiratet e Bashkuara Arabe që abstenuan, për të cilën marrëzi Presidenti i Serbisë, Aleksandar Vuçiç falënderoi me përulje, siç tha, mikun e shtetit serb, sheikun Mohamed bin Zajed Al Nahjan!

Fillimisht Presidenti i Serbisë, Aleksandar Vuçiç, prezent në Asamblenë e Përgjithshme të OKB me një performancë patriotike me flamurin serb në sallë, tha se rezultatin e këtij votimi kurrë nuk do t’ja falin iniciatorët e këtij dokumenti, që ai tha se u kundërshtua nga 87 shtete ndërsa falënderoi ata që mbështetën vrasjen e 8.372 muslimanëve nga forcat serbe në Srebrenicë!

“Unë sot e kam mbyllur karrierën, kurrë nuk do të ma falin. Shumë gjëra nuk do të mi falin, por kjo ishte gozhda në arkivol. Ata bënë gjithçka që kishin mundësi për të na mundur, e ne u ngritëm në lartësi. Nuk mund të them se kemi fituar se procedurat janë të tilla, por gjithkush e ka të qartë se cili është rezultati,” tha Vuçiç para gazetarëve sapo mbylli punimet Asambleja e Përgjithshme e OKB.

Aleksandar Vuçiç me plotë të drejtë kishte arsye për festë kur kjo është hera e parë që në OKB kombet nuk dënojnë në unaminitet një gjenocid, por, kur falënderon dhe bëhet e ditur se kush janë ata që mbështesin gjenocidin përveç se Rusia dhe Kina, ky krim bëhet po aq i madh sa dhe Masakra e Srebrenicës.

“Falënderoj Emiratet e Bashkuara Arabe që abstenuan edhe pse shumica e kanë pritur që ajo do të votoj për. I përulem deri në tokë mikut të Serbisë, sheikut Mohamed bin Zajed Al Nahjan! Kurrë nuk do t’ju harroj Serbia! Falëmnderit shumë vëllezërve hungarez, por dhe sllovakëve, grekëve dhe qipriotëve që guxuan të abstenojnë dhe treguan miqësinë ndaj serbëve. Falënderoj shtetet e shumëta afrikane dhe aziatike që kuptuan për çfarë është fjala,“ tha Aleksandar Vuçiç.

E për ata që nuk e kuptojnë Presidentin e Serbisë për çfarë është fjala, u sqaruan pas pak minutave kur u miratua kjo Rezolutë me vetëm 84 vota nga 171 shtete sa ishin në seancë, me festimet që shpërthyen në të gjitha qytetet e Serbisë.

Dhe, fatkeqësia më e madhe përveç se këtë krim e mbështeti sheiku Mohamed bin Zajed Al Nahjan, është se në këto festime morën pjesë jo vetëm ata që kryen krime, por, të rinjtë serbë që lindën shumë kohë pas Masakrës së Srebrenicës dhe u rritën duke u edukuaur nga regjimi i Aleksandar Vuçiçit për të vrarë joserbë.

Ndoshta edhe këtë fakt e injorojnë Emiratet e Bashkuara Arabe, Hungaria, Slovakia, Greqia dhe Qipro, por 24 shtatori i vitit 2023 në Banjskë dëshmoi pse rinia serbe e lindur pas luftës së Kosovës më 1999, është e gatshme të vras edhe në tokën kosovare.

Ndryshe, për të gjithë ata që janë mashtruar sikur se Gjermania, se Rezoluta mund të ndikoj në të ardhmen e Serbisë, tashmë është e qartë se janë gabuar, ashtu siç janë gabuar nga mbështetja që i kanë dhënë dhe i japin Serbisë shumë më shumë se sa viktimave, Bosnjes dhe Kosovës, sepse Presidenti serb Aleksandar Vuçiç e dha kumtin për të vrarë edhe pas kësaj Rezolute, pasi konstatoi se më shumë se gjysma e botës i mbështetë, në veçanti Emiratet e Bashkuara Arabe me mikun serb Mohamed bin Zajed Al Nahjan.