Shembet një parking në New York, një i vdekur dhe pesë të plagosur

Një person ka vdekur dhe pesë të tjerë janë plagosur, si pasojë e shembjes së një parkingu katërkatësh në New York, kanë bërë të ditur zyrtarët.

Kati i dytë i parkingut, në zonën financiare të Manhattanit, është shembur i pari, ka raportuar rrjeti televiziv, CBS.

Në disa fotografi të publikuara në rrjetet sociale është parë dëmi që u është shkaktuar makinave nga shembja.

Departamenti i Zjarrfikësve në qytetin e New Yorkut tha se operacioni i shpëtimit ka qenë jashtëzakonisht i rrezikshëm për zjarrfikësit, pasi struktura ka qenë shumë jostabël.

“Ne kemi pasur zjarrfikësit brenda ndërtesës, duke kërkuar. Ndërtesa ka qenë duke u shembur. Mirëpo tani besojmë se të gjithë punëtorët i kemi jashtë ndërtesës”.

Kryetari i qytetit, Eric Adams, tha se teknologjia e re, ka luajtur rol vital në përgjigjen emergjente.

“Dua ta theksoj, falë Zotit, ne e kemi pasur qenin robotik që ka arritur të hyjë në ndërtesë,” tha ai.

Shkaku i shembjes nuk dihet ende, raporton RFE, derisa personeli i Departamentit të Ndërtesave, është duke kryer hetime nëpër lagje, për ndonjë dëm të mundshëm.