Shërbëtorët e Edi Ramës që bënë çorapë Drejtësinë, pretendentë për kreun e Kushtetueses

Shpallja nga Gjykata e Lartë e 13 kandidatëve që garojnë për vendin vakant të kreut të Gjykatës Kushtetuese, nuk ishte thjeshtë një shpallje se kush kandidon në vend të Kryetares aktuale të Gjykatës Kushtetuese, Holta Zaçaj, por, dhe përgjigje në shumë enigma që lindën gjatë punës së këtyre juristëve që vetëm jurist nuk mund të quhen ndërsa ishin guri dhe arra e Reformës në Drejtësi!
Ende pa u marrë vendimi i Kryetarit të Gjykatës së Lartë, Sokol Sadushaj, për shpalljen e vakancës, kur gjyqtarët e Gjykatës Kushtetuese vendosën përfundimin e mandatit të Holta Zaçajt me 10 mars 2025, edhe pse ajo pretendoi se Ligji e lejonte të qëndronte në detyrë deri në fund të vitit, duke zgjidhur një nga ngërçet e krijuar në funksionimin e Gjykatës Kushtetuese, filloi të përfolet emri që do të zëvendësonte Zaçajn!

Çuditërisht, emrat e lakuar në kulisat rilindase kryesisht flasin për militantë që i shërbyen verbërisht Edi Ramës për minimin e Reformësn ë Drejtësi duke mos përfillur Kushtetutën dhe po këtë Gjykatë që synojnë ta drejtojnë.

Ndonëse Denar Biba është i bindur se për shërbimet që i bëri partisë nuk ka konkurencë, publikimi i 13 emrave do ta lë pa gjumë deri në ditën e Gjykimit, ditë kur Edi Rama një herë e mirë mendon ta mbyllë edhe këtë kokëçarje që i shkaktoi vetes me Holta Zaçajn!

Ndoshta votimin e Dekretit të Presidentit të Republikës në Komisionin Qendror të Zgjedhjeve që ekzekutoi Denar Biba duke i lejuar vetes ta drejtoj KQZ-në për të shkelur Kushtetutën me dy duart dhe këmbët që e kishin çuar në punë, ai vetë e konsideron një shërbim të madh që i bëri partisë dhe Edi Ramës; Por, në gjuhën juridike ky ishte idiotizmi më i madh që mund të bëjë një jurist sikur ta kishte marrë diplomën edhe në ditën e krimit!

Emri i shpallur që mund ti shkaktoi aritmi Denarit padyshim se është Genta Tafa jo vetëm për shërbimin që i bëri partisë por dhe për qëndrimin e saj në krye të Vettingut si kryetare e Komisionit të Pavarur të Kualifikimit përkundër shkeljeve të saj që janë denoncuar!

Ndoshta Denar Biba nuk ka faj që shqetësohet, por, të shqetësuar dhe janë anëtarët aktual të Gjykatës Kushtetuese sepse edhe dy kolegët nga Vettingu të kontestuar po aq sa Genta, konkurrojnë për postin e kreut të Kushtetueses: Alma Faskaj dhe Lulzim Hamitaj!

Nuk kuptohet kandidimi për këtë post i Gjyqtarit të Gjykatës së Apelit të Tiranës, Asim Vokshi, pasi nuk kishte Zot që e kalonte në Vetting sikur mos të ishte Genta Tafa ta kalonte! Ndonëse Komisioni i Pavarur i Kualifikimit i kryesuar nga Genta Tafa mori një raport negativ të Inspektoriatit të Lartë të Deklarimit dhe Kontrollit të Pasurive dhe Konfliktit të Interesit, ILDKPKI, i cili e akuzonte ndër të tjera Vokshin për mungesë burimesh, për fshehje pasurie, deklarim të rremë dhe refuzim për të deklaruar, kjo nuk pengoi të konfirmohet në detyrë; Vendimi i dhënë nga shërbëtorja e partisë për shërbëtorin e partisë u kuptua nga të gjithë që po e shikonin Reformën në Drejtësi të rrënuar me dorën e po këtyre njerëzve që ishin të sigurt se edhe një vendim gjyqtari aq shumë i kontestuar si Asim Vokshi mund të kalonte, nëse Vendimit i shtohet dhe detyrimi që një vendim i tij për zgjidhjen e një mosmarrëveshjeje pasurore, i denoncuar nga një qytetar duhet të dërgohet për inspektim të mëtejshëm.

Për dështimet e Irena Ninos si Komisionere Publike është përceptuar se kishte një zhgënjim në Reformën në drejtësi, por, thjeshtë kjo ishte loja. Për popullin shqiptar alergjik në kujtesë, nëse nuk kanë harruar do të harrojnë deri në muajin mars kontestimet që kishte ajo në detyrë për rastet si me gjyqtarin Julian Haxhiu që e ankimoi në KPA. Ishte e habitshme se si Nino kundërshtoi jo vetëm vendimin e kryesueses Alma Faskaj por dhe bossit të Vettingut, Pamela Qirko! Jo pse kishim të bëjmë me një juriste që bënte hatanë por është motra e Zv/Kryeministres Belinda Balluku, aktualisht pretendente kryesore për Kryetare të PS!

Dhe ja, sot, si Faskaj ashtu dhe Nino na dalin kandidate për Kryetare të Gjykatës Kushtetuese ndonëse bënë çorapë këtë Drejtësi.

E kur mundet Irena Nino pse nuk kandidaon edhe kolegu i saj Komisioner Publik, Florjan Ballhysa. Ky Komisioner është dëgjuar të akuzjoj prokurorë e gjyqtarë që nuk kanë arsyetime për të ardhurat e tyre por kur u denoncua në SPAK se kishte punuar edhe pa NIPT para emërimit në detyrë, madje edhe në institucion shtetëror si AMA ku kishte marrë 5.5 milionë lekë, të gjithë heshtën, si Prokuroria e Posaçme ashtu dhe Edi Rama. Por, sot, për kreun e Drejtësisë, ai plotëson kriterin kryesor, është shkelës i ligjit!

Nurihan Meta mund të ketë habitur sot dynjanë pse kandidon për kreun e Gjykatës Kushtetuese sepse ishte ajo që refuzoi të japë dorëheqjen si anëtare e KLP për t’i hapur rrugë një hetimi të pandikuar dhe të paanshëm nga prokurorët e Vlorës për vrasjen që kreu i biri, Rei Meta. Por, mos harroni, në Shqipërinë e Edi Ramës nuk mund të prekësh majat e Drejtësisë kur nuk ke të paktën një shkelës të ligjit në familje.

Por, çudira nga Drejtësia e re nuk vinë vetëm nga KLP, edhe KLGJ ka xhevahirët e saj që mendojnë se mund ta drejtojnë Gjykatën Kushtetuese.

Alban Toro u bë anëtar i Këshillit të Lartë Gjyqësor nga radhët e avokatisë por ishte Shoqata e avokatëve Antikorrupsion që e akuzoi për falsifikim të dokumentave. Ai u akuzua se kishte gënjyer Parlamentin për punën e tij si avokat dhe u zgjodh në KLGJ në kundërshtim me ligjin, Gjykata e Apelit la në fuqi vendimin për hetimin e anëtarit të Këshillit të Lartë Gjyqësor, Alban Toro, por, kaq ishte! Kjo ishte loja, shqipet u kënaqën, por, sot Alban Toro nxjerr kokën dhe pretendon majën e pushtetit gjyqsësor.

Çfarë institucioni është Këshilli i Lartë Gjyqësor nuk tregon vetëm anëtari i saj, Toro, por, si kreu i KLGJ, Naureda Llagami ashtu edhe “babai” i Reformës në Drejtësi, Fatmir Xhafaj. Vitin e kaluar, me rastin e prezantimit të Raportimi vjetor të KLGJ në parlament, Llagami u prit me kritika si nga deputetët e pushtetit ashtu dhe mazhorancës, ku kërkuan më shumë përgjegjëshmëri nga ky organ i lartë i sistemit të drejtësisë në menaxhimin e çështjeve të prapambetura dhe zbatimin e hartës së re gjyqësore.

Ndërsa deputeti i PS, Fatmir Xhafaj, shkoi edhe më tej duke folur konkretisht edhe për kryetaren Naureda Llagami.

“Prania e zonjës Llagami këtu ngre një shqetësim që lidhet me faktin se duke vlerësuar se KLGJ dhe KLP janë dy institucionet më të rëndësishme që garantojnë qeverisjen e sistemit, është një fakt që një e katërta e dy këshillave janë me mandat të përfunduar,” tha “babai” i Drejtësisë së Re, Fatmir Xhafaj duke shtuar se kjo gjë nuk është fare serioze.

Dhe, sot, na bëhet e ditur nga Gjykata e Lartë se kjo gjë që “nuk është fare serioze” mendon të ulet në fronin e të parit të Gjykatës Kushtetuese!

Klodian Rado nuk arriti të provojë para Këshillit të Emërimeve në Drejtësi, KED, se kishte 15 vite përvojë si “jurist”, një kusht ligjor për të kandiduar për Inspektorin e Lartë të Drejtësisë. KED vendosi të ndalojë kandidimin e ish-gjyqtarit Rado me vendimin e datës 2 Gusht 2019, por, kjo nuk e pengoi Radon të kandidon tashmë për majat e pushtetit gjyqësor.

Dhe, jo vetëm kaq! Eksperienca e tij si ekspert pranë misionit EURALIUS nuk e ka ndihmuar Klodian Radon të mësoj se kush do ta drejtësoj Drejtësinë në këtë vend sikur çdo vit të bëhet nga një Reformë; E nëse dëshiron Rado, çdo Reformë sërish ta asiston misioni EURALIUS ku ai është angazhuar!

Kështu, për këtë popull të shokuar që në Nëntorin e vitit 1944, asgjë më nuk është shokuese, as Vendimet që dha deri më sot Gjykata Kushtetuese nën drejtimin e zonjës Holta Zaçaj, as Vendimet që do të japin në të ardhmen, deri në ribërjen nga fillimi të kësaj Reforme, kur denarë e genta nuk do hanë më bukë me kokën e partisë por lugën e vetë!

Njoftim:

Kryetari i Gjykatës së Lartë, bazuar në nenin 125, pika 1 të Kushtetutës, si dhe nenin7/ç të ligjit nr. 8577, datë 10.02.2000, “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar, në datë 11.12.2024 ka bërë shpalljen publike për hapjen e procedurës së aplikimit për zgjedhjen me mandat të plotë nga Gjykata e Lartë të anëtarit të Gjykatës Kushtetuese, në vendin vakant të krijuar si rezultat i mbarimit të mandatit të znj. Holta Zaçaj.

Pas përfundimit të afatit 30 ditor të pranimit të kërkesave, kandidatët që kanë paraqitur interes për plotësimin e vakancës janë:

1. Alban Toro
2. Alma Faskaj
3. Asim Vokshi
4. Denar Biba
5. Florjan Ballhysa
6. Genta Tafa
7. Irena Nino
8. Klodian Rado
9. Lulzim Hamitaj
10. Naureda Llagami
11. Nurihan Meta
12. Rezana Balla
13. Sinan Tafaj

Bazuar në nenin 7/ç, pika 1 të ligjit nr. 8577/2000 “Për organizimin dhe funksionimin e Gjykatës Kushtetuese”, të ndryshuar, lista e kandidatëve, si dhe dokumentacioni i paraqitur prej tyre i është dërguar Këshillit të Emërimeve në Drejtësi për vlerësimin e kushteve dhe kritereve të emërimit të gjyqtarit të Gjykatës Kushtetuese nga Gjykata e Lartë.

Lista me emrat e kandidatëve publikohet në faqen zyrtare të Gjykatës së Lartë, me qëllim që institucionet publike që kanë lidhje me sistemin e drejtësisë, organizata të shoqërisë civile me veprimtari në mbrojtjen e të drejtave të njeriut ose të krijuara për mbrojtjen e interesave të përdoruesve të sistemit të drejtësisë, të mund të paraqesin opinionet e tyre në lidhje me kandidaturat pranë Këshillit të Emërimeve në Drejtësi.