Shërbimi rus i sigurisë: Pas sulmit në Moskë qëndron SHBA, Britania e Madhe dhe Ukraina

Drejtuesi i Shërbimit federal të sigurisë, FSB, Aleksandar Bortnikov, tha sot se SHBA, Britania e Madhe dhe Ukraina qëndrojnë pas sulmit në sallën e koncerteve në Moskë, ku të premten u vranë 139 persona, raporton Agjencia shtetërore ruse e lajmeve, TASS.

“Besojmë se aksionin e kanë përgatitë radikalët islamist, por, natyrisht, e kanë mundësuar shërbimet sekrete perëndimore si dhe është përfshirë direkt shërbimi sekret ukrainas,” tha Bortnikov.

I pyetur për implikimin e Shteteve të Bashkuara, Britanisë së Madhe dhe Ukrainës, Bortnikov u përgjigj: “Mendoj se ky është rasti.”

“Këto janë informacione të përgjithshme, por ekzistojnë disa elementë,” tha Drejtuesi i Shërbimit federal të sigurisë, FSB, Aleksandar Bortnikov.

Para kësaj deklarate pa asnjë fakt, edhe Sekretari i Këshillit rus të sigurisë, Nikolaj Patrushev, i pyetur nga mediat se kush e ka organizuar sulmin Kievi apo ISIS, ai u përgjigj: “Natyrisht se është Ukraina.”

Përgënjeshtrimi i Ukrainës

Ukraina sërish ka hedhur poshtë akuzat ruse për implikimin në sulm, për të cilin përgjegjësinë e mori grupi militant Shteti Islamik.

“Gënjeshtrat zyrtarisht i përhap Patrushev, e më pas edhe shef i FSB-s Bortnikov,” tha në reagimin e tij përmes rrjetit social X, Këshilltari i Presidentit të Ukrainës, Mihailo Podolak.

Ndërkohë shtetet perëndimore kanë bërë të ditur se sipas të dhënave nga shëbimet e tyre inteligjente përgjegjës është ISIS-K, fraksion ky afgan i Shtetit Islamik.

Ndryshe, në sulmin e së premtes në sallën e koncerteve Crocus City Hall në Moskë janë vrarë 139 persona dhe më shumë se 180 kanë mbetur të plagosur.

Katër persona të armatosur kanë gjuajtur mbi pjesëmarrësit e një koncerti roku. Të dielën ata u nxorën para gjykatës ruse në Moskë dhe përfunduan me masën, arrest me burg.