“Shkëlqimi” i PD në Ditën e Qëndresës Antikomuniste të Malësisë së Gjakovës
nga Nebil Çika*
“Shkëlqyet” me mungesën e tuaj Z.drejtues të PD Tropojë e më tej! Bravo ju qoftë!
Data 29 shator është dita e Qëndresës Antikomuniste të Malësisë se Gjakovës e vendosur me vendim të Këshillit Bashkiak Tropojë, vitin e kaluar.
Në këtë ditë ne përkujtojmë martirët antikomunistë, qëndresën dhe sakrificën e qindra familjeve e mijëra qytetarëve të Malësisë së Gjakovës që u vranë burgosën, internuan e persekutuan gjatë diktaturës komuniste, për shkak të përpjekjeve të tyre deri në vetëmohim, për të mbrojtur lirinë e demokracinë!
Në përkujtimin e këtij viti ra në sy, “shkëlqeu” mungesa e përfaqësuesve lokal e qendrorë të PD, kryetarit të PD Dega Tropojë, Ish-Kryetarit të Bashkisë Tropojë, deputetëve, përfaqësuesve të kryesisë etj., disa prej tyre edhe nga familje të përndjekura politike.
Ky qëndrim i qëllimshëm apo jo, dëshmon për një politikë hipokrite të tyre me të përndjekurit politikë antikomunistë të Malësisë së Gjakovës dhe Shqipërisë.
Ne të përndjekurit politikë antikomunistë i nderojmë e i respektojmë të paret tanë, sigurisht se ne nuk jemi “bijtë kundër etërve“, përkundrazi jemi krenarë për të parët tanë, sjelljen dhe sakrificat e tyre .
Ne në diktaturë jemi mësuar të jemi vetëm në fatkeqësitë tona. Ne i kemi varrosur vetëm njerëzit tanë (ata që kemi mundur tu gjejmë kufomat pasi komunistët zhdukën shumë prej tyre) me njëri-tjetrin, pa politikanë e pushtetarë për shkak të luftës së klasave dhe nuk na shqetëson shumë mospjesëmarrja e politikanëve në përkujtimin e tyre, përkundrazi.
Por sigurisht që na fyen mosmirënjohja dhe hipokrizia politike e atyre politikanëve që kanë marrë e kërkojnë të marrin mbështetjen tonë politike e elektorale.
Na dhembë thika mbas shpine, tradhtia!
Në ftesat që u kemi dërguar përfaqësuesve të PD dhe të tjerëve për këtë ceremoni dhe të tjera si kjo, ne ju bëjmë të qartë që: Pjesëmarrja nderon ata, jo ne!
Në konceptin tonë janë politikanet ata që nderojnë veten duke respektuar martirët e lirisë e demokracisë. Martirët tanë e kanë nderuar veten me qëndrimet e sakrificën e tyre. Në rastin e Tropojës, turpi e faqja e zezë është për ata që munguan në atë ceremoni fisnike në nderim të martirëve antikomunistë, gjakut dhe sakrificave të tyre prej të cilave ata janë sot në politikë e pushtet.
Mirë që nuk e keni ndjenjën njerëzore, filozofi e ideal politik për nderimin e martirëve të lirisë, por nuk jeni më as pragmatik. Se nuk është larg dita kur do vini tek ne për vota e mbështetje. Apo mendoni se do ta ”harrojmë” edhe këtë si herë të tjera?! Por mos jini kaq të sigurt! Ku i dihet ndoshta ka ardhur koha të mos “harrojmë” më!
Ju kam thëne disa herë dhe po e përsërit serish: Boll më ! Duhet ta meritoni votën tonë!
Nderim në jetë të jetëve martirëve antikomunistë të Malësisë së Gjakovës dhe Shqipërisë!
*Kryetar i Shoqatës Antikomuniste të të Përndjekurve Politikë të Shqipërisë
