Shpërthim në objektin e “Elektro-distribucionit” në veri të Mitrovicës

Një mjet shpërthyes është hedhur mbrëmë në objektin e “Elektro-distribucionit” në veri të Mitrovicës.

Besim Hoti nga Policia e Kosovës në rajonin e Mitrovicës, është shprehur për televizionin publik të Kosovës, RTK, se mbrëmë ka shpërthyer një zjarr në objektin e elektro-distribucionit në veri, ku për pasojë pjesa më e madhe e qytetit ka mbetur pa energji elektrike deri në orët e hershme të mëngjesit.

Besim Hoti tha se Policia ka dalë menjëherë në vendngjarje dhe po i zhvillon hetimet, dhe policia po dyshon se mjeti shpërthyes është hedhur qëllimshëm në objektin e elektro-distribucionit mbrëmë rreth orës 22:40.

Ndërkohë televizioni publik i Serbisë, RTS, duke ju referuar zëdhënësit të policisë në Veri, Branislav Radoviç, raporton se në objektin e elektro-distribucionit në Veri të MItrovicës mbrëmë është hedhur një bombë dore M-52 ku janë dëmtuar disa makina të elektro-distribucionit dhe kablli i tensionit të lartë, që për pasojë ka shkaktuar dhe ndërprerjen e energjisë elektrike në këtë pjesë qytetit.

Në vendin e ngjarjes ishte prokuroria dhe policia, hetimet vazhdojnë!