Shpresa te SPAK, Soreca: Duhen dënimet të formës së prerë për zyrtarët e lartë

Ambasadori i Bashkimit Evropian në Tiranë, Luigi Soreca, tha në Konferencën e Lartë Antikorrupsion se korrupsioni mbetet shqetësim serioz për BE ndërsa përsëriti thirrjen për arrestimin  dhe dënimin e  zyrtarëve të lartë. Duke shprehur shqetësim për dënimet e papërfillshme të formës së prerë për zyrtarët e lartë ai shpreson te institucionet e reja të drejtësisë, përkatësisht SPAK dhe Gjykatat e Posaçme.

“Në raportin vjetor të Komisionit është shprehur që Shqipëria ka një nivel të caktuar përgatitjeje për të qenë pjesë e BE-së. Me pak fjalë kjo është gjuha jonë teknike për të thënë se Shqipëria ka ende mjaft punë për të bërë. Kemi para një sërë dënimesh për zyrtarë të nivelit të ulët dhe të mesëm. 60% e magjistratëve që i janë nënshtruar vettingut nuk e kanë kaluar.

Ka përparime të disa institucioneve të reja në drejtësi, prokurori i përgjithshëm, SPAK. Kemi drejtuesen e BKH. Roli i ILDKPKI është shumë i rëndësishëm për kontrollin e pasurisë. Pavarësisht kësaj korrupsioni vazhdon të mbetet i shtrirë gjithandej dhe vazhdon të jetë shqetësim serioz për BE dhe shtetet anëtare. Duhen dënime të formës së prerë për zyrtarë të lartë që kanë qenë tepër të ulëta,” tha Soreca duke shtuar se qytetarët duhet të kuptojnë se askush nuk mund të qëndrojë mbi ligjin.

“Kemi shpresa te SPAK dhe gjykatat. Është premtuese që kanë nisur hetimet për 23 magjistratë të shkarkuar nga vettingu, pjesë e Gjykatës Kushtetuese dhe Gjykatës së Lartë. Hapa pozitivë janë ndërmarrë por lufta duhet të vazhdojë.

BE ka investuar më shumë se 20 mln euro për drejtësinë. BE është dakord me përfundimet e GRECO. Por lufta kundër korrupsionit është një luftë e gjithë shoqërisë dhe do të jemi fitimtarë nëse të gjithë përpiqemi së bashku.”

Në fokus të Konferencës ishin gjetjet e raportit  të GRECO-s të publikuar pak ditë më parë për Luftën ndaj Korrupsionit, i cili ka vlerësuar pozitivisht reformat e Shqipërisë e cila përmbushur shumicën e rekomandimeve dhe ato që nuk kanë përfunduar, janë plotësuar pjesërisht ndërkohë në një lidhje online, Drejtori Ekzekutiv i GRECO, Gianluca Esposito, tha se Shqipëria ka zbatuar nëntë nga dhjetë rekomandimet e paraqitura.

“Raportet e GRECO-s nuk janë përceptime. Janë raporte faktike dhe jo teorike. Parandalimi i korrupsionit para se të shfaqet është kyç, kur korrupsioni materializohet kemi humbur. 9 nga 10 rekomadimet e GRECO janë zbatuar plotësisht. Autoritetet shqiptare duhet të jenë krenare dhe të kenë meritën në këtë progres. Është bërë progres në luftën kundër korrupsionit në legjislativ dhe gjyqësor,  në këtë të fundit duhet më shumë progres,” Drejtori Ekzekutiv i GRECO, Gianluca Esposito, duke përfunduar:

“Kjo nuk nënkupton se nuk do të ketë më korrupsion në Shqipëri. Jeni në bashkëpunim me BE për luftimin e krimit ekonomik, ngritjen e regjistrimit të pasurive përfituese. GRECO do të vazhdojë të monirojë Shqipërinë.”

Ndërsa Ministrja e Drejtësisë, Etilda Gjonaj, në fjalën e saj në Konferencën e Lartë Antikorrupsion , tha se po punohet në luftimin e fenomeneve negative në sistemin e drejtësisë.

“Kemi parë të gjitha çështjet e perceptimit të korrupsionit nga ana e qytetarëve dhe e Amniisty International. Aleati ynë kryesor është qytetari. ne duam të fitojmë besimin e qytetarëve me vullnet ndaj luftës ndaj korrupsionit. Qytetarët marrin shërbime online të E-Albania, duke shmangur sportelet dhe veprimeve korruptive në këto sportele,” u shpreh ministrja Gjonaj duke u mburrur edhe me idiotësi si kjo:

“Shoqëria civile na ka mbështetur me ekspertizë. Dua të falënderoj të gjithë bashkëpunëtorët ndërkombëtarë.”