Shqipëria në BE/ Lideri i opozitës franceze: Jo! Vend i mbytur nga korrupsioni…

Kryetari i Partisë Republikane në Francë, Laurent Wauquiez, ka kundërshtuar idenë e zgjerimit të BE ndërsa për Shqipërië thotë se kemi të bëjmë me një vend të mbytur nga korrupsioni. Për këtë arsye, thekson
Wauquiez për Franceinfo, do ta kundërshtojnë çeljen e negociatave të Bashkimit Evropian me Shqipërinë duke vendosur veton.

“Emmanuel Macron është për zgjerimin e Evropës, ne jemi kundër”, tha sot Laurent Wauquiez  duke shtuar se zgjerimi i BE-së ka rezultuar një gabim i madh. Gabim prej të cilit duhet të nxirren mësime. 

“Unë mendoj se zgjerimi ka qenë një nga faktorët kryesorë në dobësimin e Bashkimit Evropian dhe ne duhet të mësojmë prej këtij gabimi”, tha
kryetari i Partisë Republikane, LR.

“Pashë çfarë ndodhi. Realiteti është se kur ka shumë vende rreth tryezës, realiteti është se standardet e jetesës, sistemet ekonomike dhe sociale janë shumë të ndryshme dhe për këtë arsye ne nuk jemi në gjendje të harmonizohemi,” tha Laurent Wauquiez duke u shprehur i vendosur se partia e tij do të kundërshtojë hapjen e negociatave për Shqipërinë.

“Presidenti i Republikës propozon hyrjen e Shqipërisë në BE. Mendoj se është një gabim i madh. Është një shtet i mbytur nga korrupsioni. Bisedimet me Shqipërinë do të hapen në Qershor, ne do të kundërshtojmë dhe do vendosim veton ndaj Shqipërisë”.