Shqipëria si Korea e Veriut, Basha në Gramsh: Pa investime të huaja, Rama mbronë klientët e tij
Shqipëria dhe Korea e Veriut janë dy vendet pa asnjë investim të ri të huaj, tha Kryetari i Partisë Demokratike, Lulzim Basha, dhe është Edi Rama që i përzuri investitorët e huaj dhe i zëvendësoi me klientët e tij.
“Asnjë investim të huaj nuk ka sjellë Rama në Shqipëri në gjashtë vjet. Shqipëriadhe Korea e Veriut janë dy vendet pa asnjë investim të ri të huaj në 6 vitet e fundit,” tha Lulzim Basha duke folur para strukturave drejtuese të Partisë Demokratike në Gramsh ndërsa e argumentoi pse Edi Rama ka ndjekur një politikë armiqësore ndaj investimeve të huaja në këto 6 vjet.
“Dy investimet e fundit të huaja janë Devolli dhe TAP, s’ka më investime të tjera. Të dyja janë kontraktuar në kohën e qeverisjes tonë. Nuk ka më asnjë investim të huaj, i ka përzënë. Pse i ka përzënë? Për të mbrojtur klientët e tij Edi Rama përzuri investitorët e huaj dhe i zëvendësoi me klientët e tij.”
Pa investime të huaja, tha lideri i opozitës, nuk ka as zhvillim, as vende të reja oune, as mirëqenie.
“Me investime të huaja ka konkurencë. Po të ketë investime të huaja, nuk shkon dot 15-fish çmimi i autostradës. Po të ketë investime të huaja nuk grabitet dot haptazi në mes të ditës. Investimet e huaja përbëjnë kërcënim për hajdutët dhe sistemin e hajdutërisë që ka ndërtuar Edi Rama.”
Me këtë rast Basha foli dhe për Samiti e Poznanit ku Shqipëria nuk paraqiti asnjë projekt infrastrukturor për financim nga Bashkimi Europian, dhe qëllimi i vetëm i kësaj politike është grabitja.
“Për hajdutin psiqik nuk është prioritet të marrë financime nga projektet europiane. Ai preferon më mirë t’i nxjerrë paratë nga buxheti i taksave tuaja dhe t’i vjedhë me 2, 3, 5, 10 e 15 fish vlerën e preventivit. Në këtë mënyrë ai, familjarët e tij dhe një grusht njerëzish kanë krijuar pasuri marramendëse,” tha Kryetari i Partisë Demokratike duke shtuar se kostoja e grabitjes së qeverisë ka rënduar mbi qytetarët shqiptarë.
“Kur ka qenë gjendja ekonomike kaq e keqe?! Kur ka qenë papunësia kaq e lartë?! Kur ka qenë kostoja e jetesës kaq e papërballueshme?! Kur kanë paguar shqiptarët çmimin kaq të lartë të energjisë, ndërkohë që të ardhurat e tyre janë më të ulëtat e rajonit dhe çmimet janë më të larta të Europës,“ vlerësoi Kryetari i Partisë Demokratike, Lulzim Basha, duke u shprehur i vendosur se do t’i përgjigjet thirrjes së shqiptarëve për ndryshim më 30 Qershor.
“Partia Demokratike e Shqipërisë do të lidhë një kontratë besimi me të gjitha grupet e interesit, njësoj si me Aleancën për Mbrojtjen e Teatrit, konkrete, të zbatueshme, ku do të detajohen ato që ne marrim përsipër të bëjmë nesër, në qeveri.”
