Shqiptarët me 1 deputet, Komisioni Zgjedhor në Bujanoc: Lista e Shaip Kamberit fitoi 698 vota!

Sipas rezultateve paraprake të Komisionit Komunal Zgjedhor në Bujanoc, në Njësinë Nr. 6 në Tërnoc të Madh, Lista e Shqiptarëve të Luginës mori 698 vota, të mjaftueshme këto që bartësi i kësaj liste, Shaip Kamberi, të fitoj mandatin e deputetit në Parlamentin e Serbisë.

Rezultatet paraprake të Komisionit Komunal Zgjedhor në Bujanoc për rivotimin e pestë në Tërnoc të Madhe tregojnë se përveç Koalicionit të Shqiptarë të Luginës, Partia Socialist e Serbisë ka marrë 8 vota, Koalicioni Shpresa dhe Alternativa për ndryshim nga 2 vota, dhe partia SNS e Vuçiçit 1 votë.

Në vendvotimin në shkollën fillore “Muharrem Kadriu” në Tërnoc të Madh janë mbajtur votimet për herë të pestë nga 3 Prilli kur u mbajtën zgjedhjet parlamentare në Serbi, dhe sipas rezultateve të Komisionit Komunal Zgjedhor, Koalicioni i Shqiptarëve të Luginës ka fituar një mandat deputeti.

Afati për ankesa është 72 orë nga momenti i mbylljes së procesit të votimit, kur pritet të shpallet rezultati zyrtar i zgjedhjeve në Tërnoc të Madh, dhe më pas edhe i zgjedhjeve parlamentare të 3 Prillit në Serbi!