Shqiptarët me 2 satelitë dhe pa bukë drejt La Manche!
“Ja dhe kjo, u tha, u bë. Sapo është lëshuar nga Cape Canaveral, Florida raketa Falcon 9, misioni i përbashkët i SpaceX Transporter 6 që transporton për në hapësirë edhe satelitët tanë, Albania 1 dhe Albania 2,” tha i ekzaltuar Kyeministri Edi Rama sapo satelitët u lëshuan në hapësirë duke lënë shqiptarët gojëhapur ndërsa ishin në pritje të fillojnë vitin e dhjetë të qeverisjes së tij, të paktën me zbatimin e disa premtimeve nga viti 2013!
Por, jo, nuk quhet kot Edi Rama dhe nuk është kot komunist!
Ja çfarë tha, që më 2013, dhe nuk e bëri!
“Do të heqim taksën 20% për bukën, do ta heqim taksën qumështin, do ta heqim taksën 20% për vezën, për miellin, për vajin, për sheqerin, dhe orizin,” gënjente komunisti Edi Rama për të marrë votën e shqiptarëve, dhe sot as në ditë të vështira nuk i ul taksat për produktet bazë, që në emër të luftës në Ukrainë kanë dalë jashtë kontrollit ndonëse ka pajisë tregun me Bordin e Çmimeve!
Madje ka dhe një arsye absurde, ku thotë se ulëm taksën e bukës por çmimi nuk u ul!
Tregu i lirë, që i referohet Kryeministri, është një mashtrim ordiner që e zbulon çmimi i energjisë.
”Betohemi që për të gjithë familjarët, taksën e energjisë do ta ulim në 6%, për familjarët!”
Tha, që në vitin 2013, dhe nuk e bëri! Mashtrimi me arsyetimet e luftës në Ukrainë është ordiner, dhe sa për konfirmim le ta marrim vetëm Maqedoninë e Veriut fqinje!
Nuk premtoi njeri, por për shkak të krizës energjetike, ndonëse shumicën e energjisë elektrike e importon, Qeveria e Maqedonisë e uli TVSH-në për produktet ushqimore dhe energjinë e konsumuar nga familjarët në 5%, dhe, duke pasur parasysh se atje sistemi enerjgetik është i privatizuar; Ndryshe nga ky padroni jonë që kapardiset me dy satelitë dhe harron premtimet elektorale edhe pse sistemin energjetik e ka shtetëror dhe ashtu si produktet ushqimore e mbanë TVSH-në 20%!
Në fund, për ata që duan të na kujtojnë se Kryeministri Edi Rama premtoi dhe nuk anuloi asnjë nga koncesionet si “Markimi i Karburantëve”, “Rapiscan”, “HEC-et mbi Valbonë dhe Vjosë” dhe “Vendburimet e naftës”, sot ju themi qartësisht se nuk ka arsye, as edhe një arsye, që qytetarëve t’ju lehtësojë jetesën!
Provoi kavjet gjatë pandemisë dhe i la kavje nën hyçmin e policëve që i referoheshin dhe vazhdojnë ti referohen “ligjit të Edi Ramës” dhe jo Kushtetutës së Shqipërisë!
Po, po, kavje, pikërisht si këto që i takoi mbrëmë dhe i quan pensionistë të veçantë, kontribues të veçantë në jetën kulturore, arsimore e sportive të vendit, ndaj të cilëve, thotë Edi Rama borxhi i veçantë do të jetë gjithnjë i pashlyeshëm!
Po pse nuk e bëri këtë respekt ditë më parë, ose për ata që janë aktiv dhe janë kontribues po si këta kur nuk ishin pensionistë dhe Kryeministri nuk do t’ja dinte se janë gjallë!
Apo, pse ta bëjë kur nuk e hapën gojën kurrë ndaj këtij regjimi, por, ishin në pritje të një gote vere kur të dalin në pension që të bëhen të pashlyeshëm!
Kështu, me fillimin e vitit 2023, deri sa bota kujdeset për çmimin e produkteve të shportës dhe energjisë, shqiptarët barkthatë me kokën lartë nga qielli do presin këshillën e radhës së Kryeministrit të tyre mashtrues, nëse satelitët e tyre krenar hahen apo pihen!
Që nuk do të shërbejnë për ndërtime pa leje, këtë e kanë të qartë të gjithë, në veçanti ata që shkelën ligjin dhe ndërtuan pa leje në kohën e Nanos, Metës dhe Saliut, të cilët vetëm sa urojnë që satelitët mos tu dalin si Artan Lame me legalizimet “pa lekë”; Sepse, dhe ata që i legalizuan ndërtimet e tyre u shpërblyen me fadromë dhe gaz lostjellës në orët e para të mëngjesit!
Deri atëherë, të gjithë ju që nuk do ti drejtoheni gomoneve në La Manche, vazhdoni e hani premtimet e vitit 2013 meqë në zgjedhjet e vitit 2021 treguat se jeni rehat!
