Shqiptarët rekord në Europë për shpenzimet për bukë, mish, peshk, qumësht, fruta

Familjet shqiptare janë aq të varfra sa detyrohen që pjesën më të madhe të të ardhurave të tyre t’i çojnë për t’u ushqyer.

Sipas Eurostat, shpenzimet nominale për ushqime, të matura sipas standardit të fuqisë blerëse, në Shqipëri ishin sa 31 për qind e Prodhimit të Brendshëm Bruto, PBB, ose asaj që prodhon ekonomia në një vit, në 2022. Kjo shifër është më e larta në Europë dhe shumë më tepër sesa mesatarja prej 6.3 për qind e PBB-së së Bashkimit Europian.

Pas Shqipërisë në vend të dytë është Mali i Zi, me 22.7 për qind të PBB-së, e ndjekur nga Bosnje Hercegovina 20.7 për qind, Maqedonia e Veriut 20.6 për qind, dhe më e ulëta është në Serbi, me 14.5 për qind të PBB-së (të dhënat për Kosovën mungojnë).

Çmimet e ushqimeve në Shqipëri janë sa 83.7për qind e mesatares së Bashkimit Europian, e treta më e shtrenjtë në rajon, pas Serbisë 89.7 për qind, dhe Malit të Zi 85.8 për qind. Më të lirat në rajon janë çmimet në Maqedoninë e Veriut, me 68.2 për qind e mesatares së BE-së.

Për bukë e drithëra, në Shqipëri shpenzohet 4.3 për qind e PBB-së, nga 1.1 për qind që është mesatarja europiane. I dyti pas nesh është Mali i Zi me 3.4 për qind të PBB-së.

Për qumësht, djathë dhe vezë, shpenzimet janë sërish rekord në 5.1 për qind të PBB-së, nga vetëm 1 për qind që është mesatarja e BE-së. Familjet shqiptare i blejnë këto produkte 11.8 për qind më shtrenjtë sesa mesatarja europiane, ndër më të shtrenjtat në Europë, ndonëse jemi një vend ku bujqësia sjell rreth 20 për qind të ekonomisë.

Shpenzimet rekord janë dhe për vajra e yndyra, në 1.5 për qind të PB-së, nga 0.2 për qind që është mesatarja europiane, ndërkohë që këto produkte blihen gati 9 për qind më shumë sesa mesatarja europiane.

Për fruta e perime shpenzohet 11.8 për qind e PBB-së, sërish më e larta në Europë, nga 1.4 për qind që është mesatarja europiane. I dyti pas nesh është Bosnje Hercegovina me 7.1 për qind të PBB-së. Frutat e perimet kushtojnë sa 72 për qind e mesatares europiane.

Edhe për mishin, Shqipëria kryeson, me shpenzime që arrijnë në 6% të PBB-së, nga 1.4 për qind që është mesatarja e BE-së. Mishi kushton sa 73 për qind e mesatares së Bashkimit Europian.

Për peshkun shpenzimet janë sa 1.1 për qind e PBB-së, nga 0.4 për qind mesatarja e BE-së. Peshku kushton sa 81 për qind e mesatares europiane. Ndonëse Shqipëria është një vend bregdetar, në Maqedoninë e Veriut mund ta gjesh peshkun më lirë, sa 68.5 për qind e mesatares së BE-së, sipas Eurostat./Monitor/