Shtëpia e Bardhë: Zgjedhjet do të mbahen më 3 Nëntor!
“Zgjedhjet do ti mbajmë më 3 Nëntor, ku do të fitoj Presidenti,” tha shefi i kabinetit të Presidentit amerikan, Mark Meadows, me rastin e deklaratës së Donald Trump se votimi përmes postës mund të ndikoj në votimin e rregullt, arsye kjo për të cilën shtroi dhe pyetjen në opinion, nëse zgjedhjet mund të shtyhen.
I pyetur nëse ishte e papërgjegjshme që Presidenti Trump propozoi një gjë të tillë, Meadows për televizionin CBS sqaroi se ai shtroi pyetjen nëse do të njihen rezultatet e zgjedhjeve nëse votimi në të tërësi do të organizohet përmes postës.
“Nëse ndodhë kjo, ndoshta rezultatin nuk mund ta kemi as deri më 1 Janar,” tha Meadows.
Njëkohësisht, Jason Miller, këshilltar në fushatën presidenciale, tha për televizionin Fox se zgjedhjet do të mbahen më 3 nëntor, sepse, tha ai, këtë e dëshiron Presidenti Trump.
Presidenti i SHBA të enjten propozoi shtyrjen e zgjedhjeve, gjë të cilën e kanë hedhur poshtë përfaqësuesit demokratë dhe republikanë në Kongres, institucioni i vetëm që mund ta marrë një vendim të tillë.
Kritikët, dhe disa bashkëpunëtorë të Presidentit Trump e kanë hedhur poshtë një iniciativë të tillë duke e konsideruar si përpjekje për të shpërqendruar vëmendjen nga gjendja e rëndë ekonomike në të cilën ndodhet vendi.
Por disa ekspertë ligjor tërheqin vërejtjen se evidentimi i përhershëm i këtij problemi mund të minojë besimin e mbështetësve të Presidentit Trump në procesin zgjedhor.
Lidhur me këtë, guvernatori republikan Asa Hutchinson, tha për CNN se zgjedhjet duhet të mbahen në datën e caktuar dhe se shtetet duhet të garantojnë mbarëvajtjen e votimit.
Në situatën e krijuar nga pandemia e koronavirusit mendohet se votimi në zgjedhjet presidenciale më 3 nëntor do të organizohet përmes postës; Dhe, raporton VOA, për këtë qëllim, zyrtarët e autorizuar për procesin zgjedhor thonë se po punojnë në projektimin e një sistemi që mundëson dërgimin e dhjetëra miliona fletëvotimeve dhe dërgimin e tyre pas votimit, në mënyrë që të numërohen votat.
