Shtrenjtime rekord në Britani, qytetarët detyrohen të kursejnë
Rritja rekorde e shpenzimeve të jetesës e ka shndërruar Mbretërinë e Bashkuar nga komb konsumator në komb kursimtar, tregon një studim i kompanisë Resolution.
“Periudha e bujshme e ndryshimit të çmimeve,” ka ndryshuar marrëdhënien e familjeve ndaj parasë së tyre, kështu shpenzimet u ulën më shumë se rënia e të ardhurave, ka bërë publike kompania Resolution rezultatet e studimit të saj.
Dhe, ashtu siç ishte parashikuar, u konfirmua se inflacioni u kthye në nivelin që kishte shënjestruar Bank of England, afër 2 për qind. Ndërkohë që ekonomistët edhe pas studimit të Resolution kishin parashikuar një inflacion prej 2.1 për qind, u konstatua se inflacioni në muajin prill ishte 2.3 për qind, dukshëm më i ulët se në maujin mars kur ishte 3.4 për qind.
Zyra e Statistikës Kombëtare raportoi se rënia e çmimit të gazit dhe energjisë elektrike rezultoi me uljen më të madhe mujore në nivel vjetor të indeksit të shpenzimeve të banimit, CPIH, dhe indeksit të çmimeve të konsumatorit, CPI, derisa rritja më e madhe erdhi nga karburanti.
“Lajm i mirë është se tani inflacioni është më i ulët se sa në eurozonë, 2.4 për qind, ose SHBA, 3.4 për qind, por çmimet vazhdojnë të jenë shumë më të larta se sa që ishin para një viti. Do të duhet kohë që të ulet presioni për buxhetet familjare,” vlerësoi ministri britanik i financave, Jeremy Hunt.
Për ministrin e financave është inkurajim për të ardhmen, konfirmimi i FMN-së që beson se ekonomia britanike do të rritet më shpejtë në gjashtë vitet e ardhshme se sa ekonomitë e Francës, Gjermanisë, Italisë ose Japonisë.
“Megjithatë, kjo nuk do të thotë se njerëzit, menjëherë do të ndjehen më mirë sepse kemi kaluar një periudhë shumë të vështirë me pandeminë dhe krizën energjetike,” tha Jeremy Hunt.
Në muajin tetor të vitit 2022, CPI arriti nivelin shumë të lartë 11.1 për qind, e duke filluar nga vitit 2021 çmimet u rritën me 22 për qind. Nga muaji dhjetor deri në marsin e vitit 2024, CPI u rrit me 3.4 për qind.
“Edhe pse është sigurisht lajm i mirë se niveli i inflacionit po normalizohet, ne kemi përjetuar një shok inflacionist të madh, më të madhin në të paktën dy gjenerata,” theksojnë studiuesit duke shtuar se ndryshimet e mëdha të të gjitha çmimeve dhe ndryshimet edhe më të mëdha në çmimet relative të energjisë dhe ushqimit vazhdojnë ti shoqërojnë qytetarët e Mbretërisë së Bashkuar.
“Kjo do të thotë se tani duhet të shpenzojmë më shumë për nevojat themelore ose të shpenzojmë në total shumë më pak se sa më parë. Kështu, kjo periudhë e bujshme e ndryshimit të çmimeve ka riformëzuar standardin tonë jetësor,” përfundojnë studiuesit. Edhe pse inflacioni përfundimisht po kthehet në nivelin e synuar, efekti i shokut të fundit inflacionist do të vazhdojë edhe për shumë kohë të lë gjurmë, shtojnë autorët e studimit.
“Kriza, nga kombi konsumator na ka shndërruar në komb kursimtar. Shpenzimi me kartat e krediti ka rënë për 13 për qind, e familjet në vit shpenzojnë rreth 54 miliardë paund më shumë se sa që ishte parashikuar,” thekson studimi i i kompanisë Resolution.
