Video/ Porti i Durrësit, zbulohen 7 pako kokainë në furgonin e linjës Shqipëri–Itali–Angli

Pas kontrollit në një furgon me targa britanike, Policia kufitare në portin e Durrësit me skanim ka zbuluar se në mjetin që transportonte mallëra ishin fshehur 7 pako me kokainë me peshë totale 7 kilogramë e 300 gramë.

Gjatë kontrollit të detajuar, kokaina u gjet brenda fundit të dyfishtë të krijuar në këtë furgon mallrash, poshtë sedijes së shoferit, ku kokaina ishte paketuar në qese vakumi.

Në prangat deri më tani kanë rënë dy persona, Arjan Doçi, 38 vjeç dhe Mentor Çuni, 39 vjeç, ndërkohë që po vijojnë hetimet për identifikimin e personave të tjerë që janë përfshirë në këtë rrjet trafiku.

“Si rezultat i intensifikimit të kontrollit, bazuar dhe në analizën e riskut dhe në inteligjencën informative të siguruar nga strukturat hetimore të Policisë së Shtetit, kanë kaluar për kontroll të detajuar në vijën e dytë, në dalje, automjetin furgon që drejtohej nga shtetasi A. D.

Nga kontrolli i imtësishëm, duke përdorur edhe teknikat bashkëkohore të kontrollit, shërbimet e Policisë gjetën të fshehura në pjesën e poshtme të sediljes, në një vend të fshehtë të krijuar për këtë qëllim, 7 pako të mbështjella me natriban, brenda të cilave kishte lëndë narkotike të dyshuar kokainë, me peshë totale 7 kilogramë e 300 gramë,” thekson Policia e Shtetit duke bërë të ditur se në cilësinë e provës materiale u sekuestruan 7 kilogramë e 300 gramë lëndë narkotike kokainë, 4 celularë, fugoni, 3950 euro, 21 700 lekë, 150 korona suedeze dhe 60 franga.

Ndryshe, furgoni i cili transportonte mallëra për emigrantë në linjën Shqipëri–Itali–Angli, ishte pronë e kompanisë “Bledi Trans”.