Shuhet Prof.Dr.Maksim Cikuli!

Shuhet Ish-Ministri i Shëndetësisë Prof.Dr.Maksim Cikuli! 

Prof.Dr.Maksim Cikuli që konsiderohet dhe themelues i gjenetikës shqiptare është ndarë nga jeta në moshën 68- vjeçare.

Maksim Cikuli lindi në Korçë më 7 janar të vitit 1952.

Në vitin 1974 mbaroi Fakultetin e Mjekësisë në Universitetin e Tiranës. Në vitet 1974-1979 ka punuar si mjek i përgjithshëm në Minierën e Bakrit të Gjegjanit. Në 1979-’81 ka qenë pedagog i sëmundjeve të brendshme në Fakultetin e Mjekësisë. Në vitet 1981-1984 ka kryer specializimin pasuniversitar në Francë në Universitetin “Paris V”. Nga viti 1984 e në vazhdim është pedagog në lëndën e Gjenetikës në Fakultetin e Mjekësisë.

Në vitin 1986 ka qenë kandidat i Shkencave Mjekësore. Në vitin 1989 ka mbrojtur titullin docent në fushën mjekësore dhe nga viti 1994 është profesor në këtë fushë.

Gjatë periudhës 1992-1994 ka qenë shef shërbimi në Pediatrinë e Specialiteteve në Qendrën Spitalore Universitare “Nënë Tereza”. Në vitin 1993-1994 Drejtor i QSUT “Nënë Tereza” dhe nga viti 2001 e në vazhdim Shef i Departamentit të Pediatrisë.

Është autor i disa teksteve për studentë dhe pasuniversitarë dhe autor i dhjetëra artikujve shkencorë mjekësorë në shtypin shqiptar dhe të huaj.

Në karrierën politike, nga viti 1994 e në vazhdim është Anëtar i Këshillit Kombëtar në Partinë Demokratike. Në vitet 1994-1997, 1997-2000 dhe nga viti 2005 e në vazhdim anëtar i Kryesisë së Partisë Demokratike.

Në periudhën 1994-1997 ka qenë Ministër i Shëndetësisë dhe i Mbrojtjes së Mjedisit. Në vitet 1996-2001 deputet i Partisë Demokratike në dy legjislatura. Dhe sërish Ministër i Shëndetësisë 2005-2008.