S’ka koalicion fitues/ PDK, LDK dhe Vetëvendosje të vetme më 6 Tetor
Afati për dorëzimin e koalicioneve parazgjedhore skadoi, dhe në zgjedhjet e 6 Tetorit që pritet të mbahen në Kosovë, përfundimisht nuk do të kemi asnjë koalicion të madh që mund të jetë dhe fitues.
Në KQZ u dorëzuan vetëm katër koalicione ndërsa tri partitë e mëdha PDK, LDK dhe Vetëvendosje do të futen të vetme në garë.
Koalcioni i parë që u regjiistrua në KQZ ishte “Vakat” i tri partive boshnjake: Demokratska Stranka Bošnjaka, Demokratska Stranka Vatan dhe Ujedinjena Stranka Bošnjaka.
Pastaj, AAK-PSD, Nisma-AKR dhe Partia e Drejtësisë u regjistruan si koalicione.
Në fund dy partitë serbe PDS dhe NPA u regjistruan në KQZ si koalicion “Sloboda”.
Deri në momentet e fundit pritej të regjistroheshin edhe dy koalicione në KQZ por negociatat dështuan.
Koalicioni LDK-VV dështoi për shkak të emrit të Kryeministrit ndonëse shpresat për regjistrimin e koalicionit të fitores ishin të mëdha deri në çastet e fundit.
Ndërkohë edhe tri partitë e vogla Alternativa, Lëvizja për Bashkim dhe Partia Fjala, dështuan në krijimin e koalicionit.
Afati për regjistrimin e partive për zgjedhjet e 6 Tetorit në KQZ skadon më 6 Shtator.
Njoftimi i KQZ
Komisioni Qendror i Zgjedhjeve njofton se është përmbyllur afati për Partitë Politike të cilat kërkojnë certifikim për pjesëmarrje përmes Koalicionit në zgjedhjet e parakohshme për Kuvendin e Republikës së Kosovës që do të mbahen më 6 tetor 2019.
Gjatë afatit të vendosur nga Komisioni Qendror i Zgjedhjeve (27 – 30 gusht) në Zyrën për Regjistrim të Partive Politike dhe Certifikim janë deklaruar këto Parti Politike se do të kërkojnë certifikim përmes Koalicionit:
Koalicioni Vakat, i deklaruar ndërmjet 3 Partive Politike: Demokratska Stranka Bošnjaka, Demokratska Stranka Vatan dhe Ujedinjena Stranka Bošnjaka;
Koalicioni AAK–PSD, i deklaruar ndërmjet 2 Partive Politike: Aleanca për Ardhmërinë e Kosovës dhe Partia Socialdemokrate;
Koalicioni NISMA–AKR–PD, i deklaruar ndërmjet 3 Partive Politike: Nisma Socialdemokrate, Aleanca Kosova e Re dhe Partia e Drejtësisë; dhe
Koalicioni Sloboda, i deklaruar ndërmjet 2 Partive Politike: Progresivna Stranka Kosova dhe Nova Partija Kosova.
Ju njoftojmë se ky kjo është vetëm periudha për deklarim të pjesëmarrjes në zgjedhje përmes Koalicionit.
Komisioni Qendror i Zgjedhjeve njofton të gjitha Subjektet Politike (Partitë Politike, Kandidatët e Pavarur, Koalicionet dhe Iniciativat Qytetare) të cilat duan të marrin pjesë në zgjedhjet e parakohshme për Kuvendin e Republikës së Kosovës më 6 tetor se afati i aplikimit për certifikim për Subjekte Politike dhe Kandidatët e tyre përfundon më 6 shtator.
Kërkesat për certifikim duhet të dorëzohen në Komisionin Qendror të Zgjedhjeve, përkatësisht në Zyrën për Regjistrim të Partive Politike dhe Certifikim, gjatë orarit të punës nga ora 08:00 deri 18:00, ndërsa në ditën e fundit të afatit aplikimet mund të dorëzohen deri në orën 24:00.
