S’ka marrëveshje me Edi Ramën, Kryetari i Grupit Parlamentar të PD: Ka vetëm dialog!
Pas mbledhjes së Grupit Parlamentar të Partisë Demokratike, kryetari Grupit Gazment Bardhi, vazhdon t’i qëndroj idesë se dakordësia e djeshme PD-PS ishte një fitore ndërsa qartësoi se nuk ka asnjë marrëveshje me Edi Ramën por ka vetëm dialog për të rikthyer jetën normale parlamentare në vend, duke plotësuar kërkesat legjitime të opozitës.
“Për ne normalizimi i jetës parlamentare ka qenë dhe mbetet qëllim i joni. Zgjidhja e kërkesave sjell normalitetin në Kuvend. Grupi parlamentar të PD i qëndron dakordësisë të arritur që dje në Konferencën e Kryetarëve. Nuk kam qëndrim për çfarë ka thënë Salianji, secili mund të mbajë qëndrimin e tij. Grupi parlamentar i Partisë Demokratike ka mbështetur dakordësinë në parim, për atë që kanë shprehur dje në mbledhje.
Me Ramën ka një dialog për t’i dhënë zgjidhje situatës në Kuvend, situatë që nuk është shkaktuar për shkak të opozitës, por se nuk janë plotësuar të drejtat e opozitës. Më 12 tetor nisi aksioni ynë, pasi na u rrëzuan dy Komisione Hetimore,” tha Gazment Bardhi dhe përkundër faktit që dy Komisionet Hetimore të miratuara priten të ngriten me Ligjin e ri, po këtë ligj ai cilëson Antikushtetues.
“Ligji për komisionet hetimore është anti kushtetues. Në asnjë rast nuk e kam quajtur ligj të mirë.
Hetimi parlamentar është çështje vullneti politik. Nëse mazhoranca do të bllokojë hetimet e ka bërë edhe më parë me ligjin e vjetër.
Kryeministri do të hetohet në Parlament siç është në hetim nga drejtësia për cështje të caktura. Ai është kundërshtar i çdo shqiptari të ndershëm. Normalizimi i jetës parlamentare është çështje brenda parlamentit por nuk ndryshon asgjë nga aksioni jashtë Parlamentit,” është i bindur Kryetari i Grupit Parlamentar të PD, Gazment Bardhi.
Ndryshe, dakordësimin në parim PD-PS për ngritjen e dy Komisioneve Hetimore dhe krjimin e një Nënkomisioni për Reformat, dje e përshëndetën Ambasadat e SHBA dhe BE në Tiranë.
“Ambasada e Shteteve të Bashkuara në Tiranë është e inkurajuar nga njoftimi për rikthimin e rendit normal në Parlament. Institucionet funksionale janë thelbësore për çdo demokraci të shëndetshme,” shprehet Ambasada e SHBA në Tiranë në reagimin e saj përmes rrjetit social Facebook duke përfunduar:
“Anëtarët e zgjedhur duhet të ushtrojnë detyrat dhe përgjegjësitë e tyre në mirëbesim brenda Parlamentit”.
Në të njejtën linjë ishte dhe Delegacioni i BE-së në Tiranë:
“Mirëpresim lajmin për rikthimin e normalitetit në Parlament. Siç kemi thënë dhe më parë, një parlament që funksionon mirë është thelbësor për të lehtësuar rrugën e Shqipërisë drejt anëtarësimit në BE, i cili është objektivi strategjik i vendit, i mbështetur nga shumica dërrmuese e shqiptarëve.”
Ndërkohë vazhdojnë negociatat për draftin final pas dakordësimit në parim PD-PS për rikthimin në normalitet të jetës parlamentare, i cili pritet të miratohet në Konferencën e Kryetarëve.
