Vendimi për Manastirin i vështirë por i domosdoshëm, Escobar: Edhe Serbisë i kërkohet të marrë vendime…

Duke mirëpritur Vendimin e Qeverisë së Kosovës për Manastirin e Deçanit, I dërguari i posaçëm i SHBA-së për Ballkanin Perëndimor, Gabriel Escobar, pas takimit me Presidenten Vjosa Osmani e konsideroi si vendim të vështirë por të domosdoshëm, por vuri në dukje s edhe Serbisë i kërkohet të marrë vendime të vështira.

“Është shumë i rëndësishëm vendimi i sotshëm për Manastirin. Ishte hap i vështirë, por i domosdoshëm. I falënderojmë institucionet e Kosovës për këtë hap,” tha i dërguari i SHBA-së për Ballkanin Perëndimor ndërsa i bëri thirrje Serbisë që të jap llogari për sulmin terrorist të 24 shtatorit.

“Të dyja palët duhet të vazhdojnë me zbatimin e plotë për të pasur marrëveshje historike. Ftojmë Serbinë të vazhdojë me zbatimin. Nuk duhet vetëm përpjekja unilaterale e Kosovës dhe marrja e vendimeve të zorshme e të vështira nga ajo, që marrëveshja e Ohrit të bëhet realitet,” tha Gabriel Escobar i qartë më shumë se kurrë për sulmin terrorist të 24 shtatorit në Banjskë.

“E ftojmë Serbinë që të gjithë ata që janë përgjegjës të dalin para drejtësisë dhe të japin llogari të plotë për atë sulm.”

Me këtë rast, ai bëri të ditur se do të ketë takime të ndryshme gjatë qëndrimit të tij në Kosovë, duke përmendur se rregullorja e re e BQK-së është një nga temat të cilat do t’i diskutojë.

“Ditët e ardhshme do t’i kalojë duke vizituar vendin tuaj, të takohem me njerëzit sepse ka shumë punë për të diskutuar, sfidat nëpër të cilat po kalojmë tani, duke përfshirë vendimin e Bankës Qendrore të Kosovës, për të gjetur mënyra se si mund të ecim para me dialogun, që përfshin Asociacionin por jo vetëm atë,” tha I dërguari i posaçëm i SHBA-së për Ballkanin Perëndimor, Gabriel Escobar, duke e quajtur gjatë kësaj konference Presidenten Vjosa Osmani si garantuesen kryesore të raporteve mes SHBA-së dhe Kosovës.

Ndërsa Presidentja Vjosa Osmani nga ana e saj ka deklaruar se bashkëpunimi me aleatët, e veçanërisht me SHBA-në duhet të jetë bosht i veprimeve të institucioneve.

“Sapo e përfunduam një takim përmbajtësor në të cilin diskutuam për zhvillimet e fundit në vendin tonë dhe proceset e rëndësishme në të cilat po kalon Republika e Kosovës. Përgjatë  çdo faze e sfide SHBA-të kanë qëndruar përkrah Kosovës, për  çka populli i Kosovës do të jetë mirënjohës. Prandaj, bashkëpunimi me aleatët tanë, veçanërisht me SHBA-të duhet të jetë bosht i veprimeve tona. Puna jonë e përbashkët me SHBA-të ka qenë dhe mbetet jetike në Republikën e Kosovës,” tha Vjosa Osmani e vlerësuar bashkëpunimin me aleatët si përpjekje të pakompromis për të siguruar sundim të ligjit në të gjithë territorin e Kosovës, ashtu dhe fuqizimin e pozitës ndërkombëtare të Kosovës, veçanërisht sa i përket integrimeve në institucionet veriatlantike.

“Prandaj bashkëpunimi me aleatët jo vetëm se është i dobishëm por edhe i domosdoshëm!”

Lidhur me procesin e dialogut me Serbinë, Presidentja Osmani tha se Kosova është thellësisht e përkushtuar por suksesi i këtij procesi varet edhe nga qasja parimore dhe e barabartë e Bashkimit Evropian ndaj palëve.

“Është kruciale të ketë zbatim të plotë të marrëveshjeve të dakorduara vitin e kaluar, veçanërisht Marrëveshjes Bazike të shkurtit 2023 dhe aneksit të Ohrit të marsit 2023. Prandaj, qasja selektive vetëm e neneve të caktuara të Marrëveshjes Bazike nuk do të ndihmojë sepse të gjitha nenet kanë rëndësi, prandaj edhe zbatimi duhet të jetë i plotë dhe jo i pjesshëm,” tha Presidentja e Kosovës duke theksuar edhe me këtë rast se angazhimi dhe roli i SHBA-së mbetet kyç për përmbyllje të suksesshme të procesit të dialogut, e cila do të dërgonte në njohje të ndërsjellë.

“Edhe procesi i largimit të katër kryetarëve të komunave në veri është duke u realizuar konform procedurave të vendosura me ligj dhe me udhëzim administrativ, në mënyrë që qytetarët e komunave të veriut të mund ta realizojnë të drejtën e tyre të garantuar në ligjin për vetqeverisje lokale,” tha Presidentja Osmani duke falënderuar partnerët, veçanërisht Shtetet e Bashkuara për konfirmimin se rendi kushtetues dhe integriteti territorial do të mbrohen përherë.

Në fund, Presidentja e Kosovës, Vjosa Osmani, tha se pret që në partneritet me aleatët të rregullohet edhe  çështja e Rregullores së re të Bankës Qendrore të Kosovës sa i përket ndalimit të dinarit.

“Zbatimi i qëndrueshëm dhe efikas i kësaj rregulloreje është i mundshëm në bashkëpunim të plotë dhe me mbështetjen e aleatëve tanë. Ata janë pro zbatimit të Kushtetutës, siç e kanë thënë çdo herë dhe në favor të një plani tranzicional të qëndrueshëm, prandaj besoj se edhe  çështja e kësaj rregulloreje do të ecë përpara me një zgjidhje të përbashkët dhe në interes të të gjithë qytetarëve të Republikës së Kosovës.”

Ndryshe, Qeveria e Kosovës ka kërkuar nga Agjencia Kadastrale që të zbatojë vendimin e Gjykatës Kushtetuese për njohjen e 24 hektarëve pronë të Manastirit të Deçanit. Këtë vendim, tha sot Kryeministri Albin Kurti në mbledhjen e qeverisë e ka marrë për ta hequr si kusht për pranimin e Kosovës në Këshillin e Evropës.

Ndërkohë mësohet se takimi I dërguarit të posaçëm të Shteteve të Bashkuara për Ballkanin Perëndimor, Gabriel Escobar, me Kryeministrin Albin Kurti pritet të zhvillohet nesër.