“SMS-ja e Lulzim Bashës”/ Hetimi, kompania celulare: U dërgua nga një platformë e huaj…
Enigma e mesazhit që u pretendua se ishte dërguar nga Kryetari i Partisë Demokratike, Lulzim Basha, në adresë të gazetares Eni Vasili, gjatë kohës që po intervistonte kryeministrin Edi Rama mori fund.
Pas hetimit të kompanisë celulare dhe me kërkesë të Partisë Demokratike, u konstatua se mesazhi është dërguar nga një platformë e huaj dhe ku është vendosur si identitet numri i liderit të opozitës. Pra, SMS nuk është gjenerura nga numri i klientit Lulzim Basha.
“SMS nuk është dërguar nga Lulzim Basha apo nëpërmjet sistemit të kompanisë celulare.
SMS është dërguar nga një platformë e huaj SMS në internet për dërgimin e SMS-ve, jashtë rrjetit të kompanisë celulare,” thuhet në letrën e kompanisë celulare.
Pas kësaj përgjigje ka reaguar Sekretari i Përgjithshëm i PD, Gazment Bardhi, duke theksuar se po përdoren lojra të pista për të sulmuar opozitën.
“E vërteta është më e qartë dhe e pastër se çdo lojë e pisët apo maskë e skaduar. Le ta shohin dhe gjykojnë vetë shqiptarët se kush e ka mendjen tek pushteti dhe përdor mesazhe të sajuara kundër kreut të opozitës. Me qëllimin e vetëm, të largojë vëmendjen nga propozimi ynë që ndihmon realisht qytetarët dhe biznesin për të përballuar krizën. 👇”, thekson Bardhi.
