Sot ari me çmim rekord

Çmimi i arit edhe sot ka mbajtur nivelin rekord, duke reflektuar kështu tensionin që kanë investitorët në pritje të raportit të Presidentit të Bankës Qendrore Amerikane, FED, Jerome Powell, për politikën monetare dhe parashikimin mbi rënien e tregut të aksioneve.

Çmimi i onsit të arit u stabilizua në treg pas mesditës së sotme në nivelin 2.126.75 dollarë. Dje në një moment arriti nivelin rekord historik prej 2.141.59 dollarë. Në kontrata ai u rrit për 0.3 për qind, në 2.135.20 dollarë.

Mbështetje këtij çmimi i ka dhënë pritshmëria mbi uljen e normës së interesit në Shtetet e Bashkuara, meqë ky ndryshim nuk ndikon në çmimin e arit. Ndërkohë nxitje shtesë ishte frika nga rënia e tregut të aksioneve që shkaktoi vala e kërkesave për kategori alternative të pronës, siç janë ari dhe bitcoin, thekson Carsten Fritsch nga Commerzbank.

Ndërkohë janë rritur edhe çmimet e mateleve tjera të çmuara. Onsi i argjendit u rrit në treg me 0.1 për qind, në 23.70 dollar, platina për 0.9 për qind, në 888.38 dollar, ndërsa palladiumi mbi 1 për qind, në 958.93 dollar.

“Mendojmë se çmimi i arit për një afat të shkurt ka shkuar shumë lartë dhe presim korrigjimin. Të dhënat nga tregu i punës në SHBA, që do të publikohen të premtën, mund ti shuajnë shpresat për uljen e normës së interesit,” tha Fritsch.

Tregtarët vlerësojnë se mundësitë për uljen e normës së interesit në muajin qershor nga ana e FED, janë 69 për qind. Ndërsa tregjet do të vëzhgojnë me kujdes edhe vlerësimin e Powellit mbi gjendjen e ekonomisë amerikane me norma të larta të interesit.