Sot festohet Fitër Bajrami

Sot festohet Fitër Bajrami!

Falja e Fitër Bajrami u bë në orën 06:10 në Sheshin “Skënderbej” në Tiranë.

Falja e Namazit e drejtoi Kryetari i KMSH, Hoxhë Bujar Spahiu ndërsa hytben e lexoi Myftiu i Tiranës, Lauren Luli

Duke ju lutur Zotit ta ketë pranuar sakrificën 30 ditore, të na ketë falur gjynahet, të ketë shtuar begatinë, paqen dhe mëshirën e Tij të pakufishme mbi çdo zemër e cila ka sakrifikuar në emër të Zotit, Kryetari i Komunitetit Mysliman, Hoxhë Bujar Spahiu i uron të gjithë besimtarëve myslimanë dhe shqiptarë kudo që ndodheni, më lejoni t’ju uroj nga zemra gëzuar Fitër Bajramin.

“Sakrifica dhe devotshmëria e muajit të Ramazanit duhet të jetë shembull i angazhimit tonë për adhurimin e Zotit të Gjithësisë, ndërsa solidariteti dhe dashuria që e karakterizojnë festën e Fitër Bajramin të jenë vlera të përhershme të shoqërisë dhe mbarë njerëzimit,” thekson Kryetari i Komunitetit Mysliman, Hoxhë Bujar Spahiu, në mesazhin e tij për Fitër Bajramin duke përfunduar:

Paçim të gjithë së bashku sa më shumë mbarësi e begati në familjet tona dhe në vendin tonë të dashur, Shqipërinë!

Në Prishtinë falja e namazit të Fitër Bajramit është bërë në Xhaminë e Madhe “Sulltan Mehmet Fatih”.

Myftiu i Kosovës, Naim Tërnava, duke uruar me këtë rast të gjithë besimtarët për festën e Fitër Bajramit, tha se feja islame angazhohet në formimin e një shoqëri të shëndoshë e humane, prandaj nëse njeriu lufton drejt këtë do të shërbejë për të mirën e shoqërisë.

“Falënderojmë Allahut me ndihëm e të cilit arritëm ta kalojmë muajin e Ramazanit. Jemi bashkë në këtë ditë madhështore për të festuar Fiter Bajramit. Muaji i Ramazanit na mbajti të bashkuar në iftare e syfyre, me solidaritet e devotshmëri. Feja islame angazhohet në formimin e një shoqëri të shëndoshë e humane. Nëse njeriu lufton drejt këtë do të shërbejë për të mirën e shoqërisë. Sot kemi festë që na bashkon me miq e farefis. Kjo festë ngrohë familjet e fëmijët tanë, kultivon më së miri ndjesinë e besnikërisë e bujarisë. Kjo festë shërben për ta ruajtur ekuilibrin tonë. Edhe këtë Bajram po e presim në pandemi që na ka shkaktuar probleme të mëdha. Urojmë që të shërohen sa më shpejt të infektuarit. Ju ftoj të bëni kujdes në vizita sepse rreziku nga pandemia nuk ka kaluar,” tha Myftiu i Kosovës, Naim Tërnava duke përfunduar:

“Urime Festa e Fiter Bajramit, shëndet e mbarësi!”

Në Maqedoninë e Veriut manifestimi qendror me rastin e Fitër Bajramit u organizua në Xhaminë e Mustafa Pashës në kryeqytetin Shkup, nën kujdesin e Bashkësisë Fetare Islame, BFI.

Xhamia historike e Mustafa Pashës ishte e mbushur me qytetarë, të cilët erdhën për të falur namazin e kësaj feste, përfshirë edhe oborri i kësaj xhamie, por duke ndjekur rregullat kundër përhapjes së virusit, me maska dhe distancë, raporton Agjencia e lajmeve Anadolu.

Namazin e Fitër Bajramit e drejtoi myftiu i Shkupit, Qenan Ismaili, ndërsa hutben e lexoi kreu i BFI-së, Shaqir Fetahu, në gjuhën shqipe dhe maqedonase. Pas namazit të Fitër Bajramit, Fetahu në një prononcim për media u uroi festën të gjithë besimtarëve.

“Sot jemi të lumtur dhe të gëzuar sepse sot kemi rastin dhe fatin që të jemi afër njëri tjetrit, të shtrijmë dorën e pajtimit, të jemi bashkë në zemrat tona, në familjet tona dhe në jetën tonë”, u shpreh ai duke shtuar se dhe gjatë tërë Ramazanit, por edhe prej momentit të parë të COVID-19 kanë qenë të organizuar në nivelin më të lartë duke respektuar të gjitha normat që i parasheh Islami si dhe të gjitha masat që i kanë paraparë të gjitha institucionet kompetente.