Sot festohet Fitër Bajrami

Sot festohet Fitër Bajrami!

Falja e Namazit të Bajramit u bë në orën 06:40 në Sheshin “Skënderbej” në Tiranë nën drejtimin e Kryetarit të KMSH, Hoxhë Bujar Spahiu, i cili në fjalën e tij u shpreh se pas pas një muaj sakrifice dhe ngritjeje shpirtërore, e lusim Zotin të na e ketë pranuar këtë sakrificë, Ai është shpërblyesi më i mirë.

“Ky muaj na ka bashkuar në bamirësi e solidaritet, në paqe e dashuri me njëri-tjetrin. Ramazani na mësoi që të bëhemi shërbëtor të së mirës dhe së drejtës. Ta vijojmë jetën me vitytet që kemi fituar në këtë muaj të begatë! Duhet të jetë pikërisht virtyti themel i veprimtarisë sonë të përditshme,” tha Hoxhë Bujar Spahiu duke bërë thirrje reflektimi për disa nga plagët më të rënda sociale nga të cilat po vuan shoqëria jonë sot.

“Motra dhe vëllezër, kujdesuni që kombi ynë të rritet nëpërmjet virtytit! Secili nga ne e ka detyrë të kontribuojë për të frenuar mpakjen e kombit. Po pakësohemi dita-ditës. Ne që kemi qenë një nga popujt me moshën më të re në Europë po plakemi me ritme shumë të shpejta. Familja është bërthama e çdo shoqërie. Ta forcojmë atë ashtu siç e kemi traditën tonë të shkëlqyer. T’i rrisim fëmijët tanë këtu në vendin tonë si qytetarë me virtyte të larta,” tha Kryetari i KMSH, Hoxhë Bujar Spahiu, duke përfunduar:

“Të shtrijmë dorën e mëshirës dhe kujdesit ndaj prindërve, fqinjëve, e cilitdo që ka nevojë për ne. Zoti u bekoftë ju, familjet tuaja dhe kombin tonë!”

Programi i plotë:

06:10 – Hapja

06:15 – Lexim Kurani nga Imami i Xhamisë “Et’hem Bej”, z. Elton Karaj

06:20 – Fjala përshëndetëse e Kryetarit të KMSH-së, H. Bujar Spahiu

06:30 – Ligjëratë nga Nënkryetari i KMSH-së, z. Taulant Bica

06:40 – Falja e Namazit të Bajramit, prinë faljen Kryetari i KMSH-së, H. Bujar Spahiu

06:45 – Hutbeja e Bajramit nga Myftiu i Tiranës, z. Lauren Luli.