Sot hyjnë në fuqi sanksionet e BE-së ndaj Rusisë

Raundi i parë i sanksioneve të Bashkimit Evropian, BE, kundër Rusisë kanë hyrë sot në fuqi, tha një diplomat i BE-së.

Një ditë më parë, BE ka futur në listë të zezë shumë politikanë rusë dhe ka ndaluar tregtinë midis bllokut dhe dy rajoneve separatiste në lindje të Ukrainës, Donjeck dhe Luhansk, raportonton RFE. Kjo, pasi presidenti rus, Vladimir Putin, njohu më 21 shkurt Donjeckun dhe Luhanskun si entitete të pavarura.

BE zgjodhi të mos e sanksionojë vetë Putinin, por të fusë në listën e zezë të gjithë anëtarët e Dhomës së Ulët të Parlamentit rus, që votuan në favor të njohjes së rajoneve separatiste si të pavarura.

Bashkimi Evropian ngriu çdo pasuri që ata kanë në BE dhe u vendosi ndalesa udhëtimi.

Bankat e përfshira në financimin e aktiviteteve separatiste në lindje të Ukrainës janë gjithashtu në shënjestër të sanksioneve, ndërsa dy rajonet do të hiqen nga një marrëveshje e tregtisë së lirë midis BE-së dhe Ukrainës.

Sanksionet, raporton RFE, të miratuara tashmë në parim nga ministrat e Jashtëm të BE-së, kanë ende nevojë për miratim zyrtar nga ta. Ky është më shumë një formalitet që pritet të ndodhë sot gjatë ditës dhe sanksionet do të hyjnë në fuqi sapo të publikohen në gazetën zyrtare të BE-së.