Zyrtare, Alain Giresse merr drejtimin e Kosovës

Trajneri i njohur francez, Alain Giresse sot është emëruar përzgjedhës i Përfaqësueses së Kosovës.

Në një konferencë për media të organizuar sot nga Federata e Futbollit të Kosovës, FFK, tekniku francez ka marr timonin e Dardanëve.

Presidenti i FFK-së, Agim Ademi tha se është shumë i lumtur që Giresse ka pranuar ftesën për ta marrë këtë detyrë, dhe se përvoja e tij si trajner jep siguri për arritjen e objektivave të cilat i ka Kosova.

“Çdo lojë do të marrim në konsideratë. Gjithmonë duhet të mundohemi të bëjmë më të mirën. Duhet të mundohemi që të kemi rezultate sa më të mira. Tash nuk mund të themi se ku janë kufijtë e Kosovës, duhet të kemi ambicie. Çdo lojtar duhet ta ketë ambicien e njëjtë,” tha Giresse

I pyetur për gjasat e Kosovës në Ligën e Kombeve, Giresse pohoi se në asnjë garë sportive paraprakisht nuk ka fitues.

“Nuk di a ka ndonjë garë me dite paraprakisht kush është fitues. Nuk mund të ketë parashikim, nuk mund të dimë a jemi në grupin favorit, loja shihet në terren. Ne gjithsesi duhet të luajmë në maksimum pa nënvlerëusar ekipin, por ne duhet të kemi ambicie që të bëjmë më të mirën. Gjithçka është e mundshme në futboll,” tha Giresse duke shtuar se pret angazhim të madh nga të gjitha ata që janë rreth kombëtares, sidomos nga ana e futbollistëve që veshin fanellën e Kosovës.

Ndryshe, Alain Giresse, në karrierën e tij ka drejtuar kombëtaret e Gjeorgjias, Gabonin, Malit, Senegalit dhe së fundi Tunisias. Ai gjithashtu ka drejtuar edhe dy ekipet më të njohura franceze, PSG dhe Toulouse.

Aventurën në krye të bankinës së Kosovës, Alain Giresse e nis me miqësoret e muajit mars, kundër Burkina Fasos (24 mars) dhe Zvicrës (29 mars).

Alain Giresse është pasuesi i zviceranit Bernard Challandes, i cili u shkarkua muaj më parë për shkak të rezultateve të dobëta gjatë vitit 2021.