Sot kombi amerikan në zi për ish presidentin George H.W. Bush

Pesë presidentë amerikanë do të jenë së bashku sot për t’i bërë nderimet e fundit presidentit të 41-të të Shteteve të Bashkuara, George Herbert Walker Bush, i cili vdiq të premten në moshën 94 vjeçare.

Ish presidentët, Jimmy Carter, Bill Clinton dhe Barack Obama, do t’i bashkohen presidentit aktual, Donald Trump, në funeralin që do të mbahet në Katedralen Kombëtare në Washington, ku do të ndjekin eulogjinë nga George W. Bush, i biri i presidentit të ndjerë dhe presidenti i 43-të i Shteteve të Bashkuara.

Në funeralin shtetëror është paraparë të flasin edhe ish kryeministri kanadez Brian Mulroney, ish senatori amerikan Alan Simpson dhe historiani, Jon Meacham, biografi i Bushit.

Në mesin e dinjitarëve që do të marrin pjesë në funeral janë princi Charles i Britanisë së Madhe, kancelarja gjermane Angela Merkel, dhe ish presidenti polak Lech Walesa.

Shërbesa e së mërkurës do të fillojë kur një autokolonë do të dërgojë arkivolin e mbështjellë më flamur të ish presidentit në Katedrale nga Kapitoli ku ai qëndroi të martën derisa mijëra njerëz i shprehën nderimet e fundit.

Një moment emocional u shënua kur ish senatori 95 vjeçar, Bob Dole, u ndihmua të ngrihej nga karroca e tij për të përshëndetur veteranin e republikanëve dhe të Luftës së Dytë Botërore.

Pas funeralit, arkivoli i ish presidentit Bush nesër do të dërgohet në bazën ajrore Andreës dhe prej andej në Houston në Texas për shërbesën e dytë dhe të fundit. Ai do të varroset afër bashkëshortes së tij për 73 vjet, Barbara, e cila vdiq në muajin prill dhe të bijës së tyre Robin, e cila vdiq në vitin 1953 nga leukemia kur ishte vetëm tre vjeçe.

Presidenti Trump e ka shpallur të mërkurën ditë zie në nderim të presidentit Bush. Bursa e New Yorkut do të jetë e mbyllur sikundër edhe pjesa më e madhe e zyrave qeveritare./VOA/