Sot, Protesto!
Sot nuk ke bust për të rrëzuar, sot nuk e ke kriminelin Ramiz Alia për të negociuar, sot nuk e ka as Neritan Cekën për të devijuar, por, sot ke 1001 arsye për të protestuar kundër pronarit të të gjitha pushteteve në Shqipëri, Edi Rama, që ta ka pamundësuar jetesën, jo vetëm pse këtë e thotë lideri i opozitës! Dhe, nuk ke asnjë arsye të vetme të qëndrosh indiferent sepse Sekretari amerikan i Shtetit e përqafoi krijuesin e këtij regjimi, ose ca burkokrat evropian qeshën me kllounizimet e tij berlineze!
Sot protesto edhe pse regjimi u mundua të të frikësoj me policinë e Taulant Balllës duke bërë të ditur se Policia e Shtetit është në gatishmëri, se mbi 1100 forca të policisë, duke nisur nga ato të rendit, FNSH, Shqiponjat, Garda e Republikës dhe RENEA, do të jenë në terren për mbarëvajtjen e protestës.
Po, protesto edhe pse do të ketë edhe autobotë me ujë, kordon me efektivë policie para kryeministrisë me dyer të blinduara dhe perimetrit rreth saj, agjentë civilë, kamera me rezolucion të lartë përgjatë gjithë bulevardit “Dëshmorët e Kombit”.
Sot protesto jo vetëm për kumtin e liderit të opozitës, Sali Berisha:
O sot, o kurrë, me 20 shkurt të gjithë në shesh!
Sot protesto duke pushuar së ankuari në kafe se ke pensionin e ulët, dhe nuk të është rritur nga viti 2013 derisa çmimi i djathit ka shkuar 16 euro!
Sot protesto sepse nuk ka më nevojë t’i rrëfesh askujt se si e mori botën në sy biri yt i vetëm, e bija, nipi e mbesa sepse nuk kishin as bukë për të ngrënë!
Sot protesto pasi je lodhur nëpër gjykata duke kërkuar drejtësinë nga viti 2013, pse të hoqi regjimi komunist nga puna vetëm pse ishe demokratë! Se kur do ta marrësh pronën, këtë përgjigje vetëm gjykatat e këtij regjimi nuk ta japin dot sepse ky regjim të plaçkiti!
Sot protesto edhe t’i mjek e infermier pa na treguar vuajtjet me koncesionin kriminal të hemodializës, ku jeni të detyruar ta furnizoni me pacientë, Spitalin që blen Spitale; Ose, dhe, sterilizimit që ishe i prenotuar të heshtësh!
Sot protesto edhe t’i socialist që thua se nuk e kupton krimin e madh rilindas me inceneratorët për të cilin foli Zv/Kryeministri Arben Ahmetaj, por, që më në fund e the edhe me zë se shëndetësia nuk është falas!
Sot protesto edhe ti student i mjekësisë dhe jo vetëm, sepse ky që është në krye të qeverisë, është ai që të minoi protestën tënde dhe gjithë ato protesta që shpërthyen nga pezmi e jo guximi për ta kundërshtuar këtë njeri të çmendur që nuk është vetëm taksirati juaj!
Sot protesto edhe t’i gjyqtar dhe prokuror i flakur në rrugë nga vettingu i regjimit dhe ishe me shpresë se edhe mund të kthehesh në sistemi e drejtësisë!
Sot protesto edhe ti që verbërisht i besove Reformës në Drejtësi dhe më në fund e kuptove se thjeshtë ishte një sitë e drejtësisë nga Partia Socialiste!
Sot protesto edhe ti që ke mbetur pa kulm mbi kokë nga tërmeti i 26 nëntorit 2019 pasi e kuptove se rindërtimi ishte thjeshtë punë hajdutësh për xhepat e Piktorit dhe Tigrit!
Sot protesto dhe ti fermerë që heshte për Ballkanin e Hapur edhe pse e kuptove që ditën e parë se ishte një pushtim i mirëfilltë i bujqësisë shqiptare nga shkau! Mos na trego më stokun, inputet, subvencionet dhe çmimin e naftës, kaluan 11 vite dhe ato nuk i ke parë me sy, dil në shesh dhe kërko të drejtën tënde!
Sot protesto edhe ti o taksist sepse ky kriminel erdhi në pushtet ndërsa mendonte për hallet e shqipëtarëve duke i dëgjuar nga rrëfimi i taksistit, dhe sot nuk pyet për njeri deri sa ka Qetin, Samirin, Avniun e Bolanon!
Sot protesto ti kuksian e tropojanë që jo vetëm të la pa gjykatë e spital, por më as aromë shteti nuk ndjen dot dhe ke ngel me sy nga Prizreni e Gjakova! Pse po rritet bari në Aeroportin e Kukësit mos pyet, ai nuk do punoj aq ishte e ndoshta mund të jetë dhe test për një Aerodrom Bari meqë për Shtëpi Bari po ky Piktor me propagandën e tij e ka promovuar si brend kuksian!
Sot protesto edhe ti o dibranë që një Piktorë i dështuar të tërheq zvarrë për 11 vjet me 17 kilometrat e Rrugës së Dibrës që i la pa përfunduar ai “Saliu i keq”! Mos harro, që ky llumi i Kristaqit që 132 muaj është në pushtet dhe nuk po e bënë dot Rrugën e Dibrës, derisa Rruga e Kombit me 6 kilometra tunel dhe gjithë ato ura u ndërtua për 24 muaj me Qeverinë Berisha!
Sot protesto edhe ti o shkodranë që heshtë edhe kur përmbytesh me Benet Becin por hap barkun në kafe, mos fol më për lungomare pavarësisht se çfarë të tha mashtruesi i shquar i Sekretarit të Sorosit; Pse na thua se nuk ka ku e vë lungon kur nuk ka mare! Dil dhe protesto, për padrejtësinë që të është bërë dhe mos na trego më se Tom Doshi është bossi i Shkodrës! Dhe, sot, protesto duke mos i çarë më kokën askujt në kafe, pse nuk po e kupton më kur e ke as ditën e karnevaleve!
Sot protesto edhe ti korçarë që vërtetë besove që njeriu që nuk e menaxhoi dot Tiranën për tre mandate, do ta bëjë dhe rrugën që e kishte për ta përmbyllur e jo ta ndërtoj nga e para. Ja që u shemb dhe ti rebelohesh kot kafeneve! Pusho, ti i dhe votën dhe ky është mëkati që nuk ke pse t’ia thuash njeriu; Dil, flake këtë llum që i besove me protestën e 21 Janarit 2011, dhe nëse nuk e ke të qartë se si të protestosh, duhet të jesh i relaksuar sepse askush nuk këshillohet nga Avokati i çmendur që ishte i gatshëm për 10 mijë viktima!
Sot protesto edhe ti nga bregu i jugut që na çmende me tunelin e Samir Manes! Pse nuk i bëri dy tunele në Kardhiq por hapi tunel për kompleksin e Samirit, ky nuk është një problem vetëm i Sarandës dhe Himarës, dil protesto pse ndërtohet andej nga shkon Samiri dhe jo zhvillimi i turizmit të Shqipërisë!
Sot protesto edhe ti durrsak jo pse mbete pa Port, por, sepse mashtrimi me arabë dhe koncesion ishte aq i trashë sa ulërimat e serbëve të mashtruar në Beograd po me këtë investitor strategjik, po dëgjohen deri në Malin e Tomorrit. Jo o durrsak, as Al as Abbar nuk e vret mendjen për shqiptarët, dhe bota deri më sot nuk ka njohur Port Jahtesh me 2-3 kamionë zhavorr, por, ai pret shitje apartamentesh për t’ju shitur “investime strategjike”, ju që jeni aq shumë të varfër me detin që ju dhuroi Zoti, sa arabët që kanë naftën! Pse?! Alabbar dhe Piktor ka me shumicë, kudo, ku populli heshtë dhe dhuratën e Zotit edhe e përvetëson dikush!
Sot protesto edhe ti tirons që aq shumë u ankove që kur Piktori mori sëpatën dhe filloi zhdukjen edhe gjithë trashëgimisë së qytetit tuaj, o ju njerëzit më të mrekullueshëm të kombit shqiptarë! A duhet të jesh i kënaqur me një apartament që të dha Edi ose Lali Eri në pallatin që u ndërtua në tokën tënde, ose në rastin më të keq kur ta punësoi fëmijën në bashki ose ministri?! Jo, se këtu filloi dhe ngjizja e së keqes në familjen tënde, nuk e punësoi por e bëri patronazhist, ta bëri pis familjen aq sa as krimineli Enver Hoxha nuk e bëri dot! Dhe, nuk kishte as si të ankoheshe për regjimin që të mashtroi me tokën, kur ushtarin e regjimit ta uli në sofër!
Besove se bëre mirë që luftove për të shpëtuar Piramidën e diktatorit sepse Lali Eri duke i futur pak llum amerikan Qendrës së tij Teknologjike, do të mund të mbuloj Makaronat e Banës me teknologjinë e Piktorit. Jo o tirons i mirë, diktatori është diktator, piramida është piramidë, i biri i atij që nuk denjon ta shpëtoi duke e parë një poet se si varet nuk ka se si të jetë ndryshe vetëm si Edi Rama! Dhe, diktaturës së makaronave teknologjike duhet t’ju japësh përgjigje ashtu siç i dhe diktaturës komuniste më 20 shkurt 1991!
Sot protesto edhe ti o besimtar i verbër i Lulzim Bashës dhe lëre mos numëro se sa mbështetës dalin në protestën e Saliut, e aq më shumë nostalgjinë e protestave të Lulit! Nëse vërtetë vazhdon ti besosh Lulit, mos harro se ai tha në vitin 2021 që Sali Berisha vazhdoi të jepte urdhra edhe pas vitit 2013 kur ai u zgjodh Kryetar i PD! Pra, ai nuk na paska organizuar asnjërën prej protestave që ti flet me nostalgji, sepse rezulton se edhe për ato na paska vendos Saliu! Lëri këto llafer, sot, dil dhe protesto për të keqen e madhe të këtij vendi, Luli është dëm kolateral, këtë arrite ta shohësh edhe ditë më parë kur Sekretari Blinken erdhi në Tiranë dhe kryetari jot nuk u bë proamerikan vetëm pse Edi Rama nuk deshi të jetë i tillë!
Sot, dil edhe ti o demokrat i mërzitur që vetes i thua “pa parti” e së fundi i dhe vetes të drejtë me spotin e kësaj proteste ku veçove një estabilishmentin që po mbijeton në këtë parti! Mos u dekurajo, pavarësisht gabimeve dhe llumit të infiltruar edhe kur Partia Demokratike është në procesin e rithemelimit, sepse përkundër artilerisë shtetërore që përdori Edi Rama, PD ekziston!
Pra, sot, protesto o shqiptar, sheshi të pret në 17:30!
Në fund, për ju të tjerët, që keni vendosur të bashkëjetoni me dhunën e Edvin Kristaq Ramës, do ta keni pak bezdi, por, jo Doktori malok por Piktori me sëpatë që e ka aq shumë frikë, do bllokoj këto segmente rrugore dy orë para nisjes së protestës deri në përfundim të saj: Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.
