Spaho: Rama në rolin e Kryeprokurorit, kërkon të fshehë vrasjen mafioze të shoferit të Xhafajt

Vrasje mafioze dhe jo skenar fantazie sikundër kërkon ta shesë Kryeministri Edi Rama, e ka cilësuar Partia Demokratike, humbjen e jetës së shoferit të ministrit të Brendshëm, Fatmir Xhafaj.

Përmes një deklarate për mediat, nënkryetari I PD-së, Edmond Spaho, hodhi poshtë pretendimet e kryeministrti Rama nga Korça se me vdekjen e Shkëlzen Qordjes po abuzohej politikisht kur ai në të vërtetë kishte kryer vetëvrasje.

“Këto 5 vjet në pushtet Edi Rama ka mohuar çdo skandal që implikon atë dhe qeverinë e tij në krim! Edi Rama quajti skenar fantazie edhe transportin e droges me avionë. Ai tha se kriminelet në Parlament dhe bashki ishin skenarë makabër të opozitës.

Kanabizimin e vendit Edi Rama e quajti njësoj si sot, skenar fantazie makabër.

Përfshirjen e Saimir Tahirit me Audin e tij AA 003 GB në trafikun ndërkombëtar të drogës bashkë me Habilajt, Edi Rama e cilësoi skenar kriminal të opozitës.

Edi Rama mohoi për 5 vjet dënimin e Agron Xhafës, vëllait të Ministrit të Brendshëm, për trafik ndërkombëtar droge.
Tani, po mohon, me të njëjtat fjali, përfshirjen e Taulant Ballës, në pastrimin e parave të drogës me çështjen e 3.4 milionë eurove, të kapura në Toyota Yaris vetëm pasi u denoncuam nga opozita.

Mohimi i këtyre të vërtetave e la Shqipërinë jashtë Europës! Sepse më vend të së vërtetës dhe të Europës, Edi Rama zgjodhi Saimir Tahirin, Fatmir Xhafën, Taulant Ballën, bashkëqeverisjen me krimin dhe drogën, duke tradhëtuar interesat e shqiptarëve.

Me Edi Ramën kryeministër dyert e Europës do të vazhdojnë të jenë të mbyllura edhe Qershorin tjetër.
Edhe për faktin se, për të fshehur një vrasje mafioze, Edi Rama ka marrë publikisht rolin e kryeprokurorit, duke paracaktuar se vrasja mafioze ishte vetëvrasje me 3 plumba”, tha Spaho.