SPAK për të gjithë, të gjithë për SPAK!
Vetëm me arrestimin e Kryetarit të Bashkisë Tiranë, Erion Veliaj, gjashtë vjet pas krijimit dhe pasi doli nga goja e Lali Erit, shqiptarët u bindën se Struktura e Posaçme Kundër Korrupsionit dhe Krimit të Organizuar, SPAK, drejtohet nga Sigurimi i Shtetit!
Janë shumë rastësi deri në arrestimin e Lali Erit, që strategjinë e veprimit të kësaj Strukture të Posaçme Kundër Korrupsionit dhe Krimit të Organizuar mund ta përmbledhësh vetëm me thënien e famshme të Alexandre Dumas tek “Les Trois Mousquetaires”, dhe një rastësi thelbësore me tre musketerë që u shfaqën të çlirojnë Drejtësinë në Shqipëri por shërbyen vetëm si frymëmarrje për ekzistimin dhe veprimin e kësaj Strukture të Posaçme:
Të gjithë për SPAK, SPAK për të gjithë!
Po kush janë këta tre musketerë, për të cilët vetëm pas 6 vjet veprimi opinioni filloi të bindet që e kthen edhe ujin përpjetë dhe asgjë nuk ka të bëjë as me drejtësinë e aq më pak me “heronjtë e fëmijëve tanë!
Yuri Kim
Heqja dorë e Prokurorisë së Krimeve të Rënda për të hetuar seriozisht trafikantin ndërkombëtar të drogës që u konfirmua nga autoritetet italiane, Ministrin e Brendshëm, Saimir Tahiri, tregoi se kishim të bëjmë me një strukturë që nuk kishte lidhje me kontrollin e supozuar komunist nga Sali Berisha ndonëse ishte krijuar në kohën kur Saliu ishte Kryeministër, por, propaganda që kishte nisur me kohë kundër kësaj strukture duke e etiketuar si “Prokurori të Saliut” krijoi një dozë dyshimi mbi iniciatorin e kërkesës së Reformës në Drejtësi ndonëse qiriu mbi këtë tortë të hidhur ekspozohej, Ambasadorja e SHBA, Yuri Kim!
Pavarësisht parullave të Yuri Kim mbi “heronjtë e fëmijëve tanë”, dyshimeve të arsyeshme mbi funksionimin e Gjykatës së Apelit dhe domosdoshmërinë e Reformës në Drejtësi, mosprekja e kësaj Gjykate deri në fund dhe goditja e Gjykatës Kushtetuese që nuk kishte kurrfarë lidhje me korrupsionin në Drejtësi dëshmoi që në fillim se kjo Reformë nuk filloi dhe nuk po realizohej nga njerëz kompetentë në Drejtësi.
Duke keqpërdor brendin “Amerika” askush nuk dyshoi mbi futjen e hundëve të bandës kriminale të George Soros, “Shoqëria e Hapur”, aq më pak kur nëpër të gjitha mediat e kontrolluara nga qeveria flitej se si Saliu e solli Sorosin në Shqipëri ndërsa fotot shpërndaheshin sikur mielli dhe uji në Etiopi, pa u thënë në asnjë moment e vërteta!
Dhe, derisa strukuturat e kësaj Reforme po ngriteshin dhe kryesisht kishim të bënim jo me ajkën në Drejtësi por bursistë ose njerëz të financuar nga Fondacioni Soros ndërsa në horizont nuk kishte “heronjë” e aq më pak “fëmijët tanë” që po i shikonin me admirim, vetëm me ngritjen e SPAK-ut si një organ i pavarur gjyqësor i ngarkuar me hetimin e korrupsionit dhe krimit të organizuar në nivelet më të larta të qeverisë dhe shoqërisë në Shqipëri, dhe emërimin në krye të saj të një hetuesi të Sigurimit të Shtetit, ra velloja e dyshimit mbi këtë Strukturë!
Dhe jo vetëm kaq! Velloja e dyshimit u rëndua edhe më shumë, dhe tejkaloi ato që po ndodhnin në Vetting i cili u shndërrua hapur në strukturë politike, kur në krye të BKH-së u emërua një kuadër i Partisë Socialiste që po punonte në Policinë e Shtetit.
Shumë propagandë me vizita në FBI, ekspozimi me institucionet amerikane vuri në dyshim dhe arsyen se pse zhvillohej Reforma në Drejtësi edhe pa u zbuluar që FBI ishte në shërbim të Partisë Socialiste, ose më saktë Edi Ramës ashtu si dhe Yuri Kim që vetë Kryeministri e pagëzoi Sekretare të Partisë dhe ajo nuk reagoi!
Mosreagimin e saj, mediat në shërbim të Edi Ramës e arsyetuan me faktin se ajo nuk e njeh historinë e diktaturës në Shqipëri, por citimi i Enver Hoxhës nga vetë Yuri Kim në selinë e Partisë Demokratike me mesazhin e qartë për demokratët se do hanë barë nëse votojnë Sali Berishën dhe jo Lulzim Bashën, konfirmoi jo vetëm orientimin e kësaj ambasadoreje por dhe dyshimet se administrata shqiptare e angazhuar në Ambasadën e SHBA ishte e përmbytur nga Sigurimi i Shtetit!
Përtej hetimeve të befta të SPAK dhe lejimit të ministrave të Edi Ram të largohen nga posti para se të shpallen të pandehur nga Struktura e Posaçme, si dhe akuzimi dhe kontrollimi i lëvizjes së Sali Berishës nga SPAK, tregoi se Yuri Kim nuk ishte thjeshtë një Ambasadore e SHBA, ose Departamenti i Shtetit nuk është thjeshtë një departament amerikan që drejtohet nga Sekretari i Shtetit!
Zhvillimi i ngjarjeve me Reformën në Drejtësi, SPAK dhe FBI në Shqipëri dëshmoi një situatë shumë më të rëndë se sa mbështetja perëndimore për stabilokraci në Shqipëri kur Yuri Kim i uroi fitoren Edi Ramës ende pa e hapur ai vetë shishen e verës 30 mijë euroshe “Romanée Conti” për fitore në zgjedhje, sepse sapo ishin mbyllur qendrat e votimit!
Ndërsa një pjesë e mirë e shqiptarëve filluan t’a përtypin shpalljen e Sali Berishës “non grata” dhe arrestimin e tij të paligjshëm, korruptimi i një Zyrtari të lartë të FBI nga një agjent i Sigurimit të Shtetit, rrëzoi gjithë piramidën propagandistike që ishte krijuar me SPAK-un dhe Amerikën, por porta e kësaj Piramide Kriminale u hap vetëm me fitoren e Presidentit Donald Trump!
Sot nuk është deklaruar zyrtarisht edhe pse është e qartë veprimtaria e Sekretares së Parë të Edi Ramës, shefit të saj në Washington dhe të Kryeministrit shqiptar, George Soros, të cilin me një rast e falënderoi edhe Babai i Drejtësisë, Fatmir Xhafaj!
Edi Rama
Për 6 vjet Kryeministri Edi Rama e luajti mirë lojën me mbështetjen e Strukturës së Posaçme Kundër Korrupsionit dhe Krimit të Organizuar, rolin e Amerikës dhe arrestimin e disa zyrtarëve socialistë që kishin këputur dardha e kumbulla pa lejen e Kryeministrit deri sa SPAK nuk i shkeli në kallo me Zv/Kryeministrin Arben Ahmetaj dhe së fundi Kryetarin e Bashkisë Tiranë, Erion Veliaj!
Edi Rama arriti të bindë një pjesë të konsiderueshme të shqiptarëve se SPAK-un e krijoi dhe po e kontrollon Amerika, u shfaq i habitur kur Fatmir Xhafaj falënderoi në një ceremoni “Fondacionin Soros” për Reformën në Drejtësi, por me ndryshimin e zhvillimeve politike si në veprimtarinë e Prokurorisë së Posaçme kur filloi dhe arrestimi i eksponentëve të krimit që i ishin bashkuar qelbësirave në vitin 2013 për ta rrëzuar Saliun nga pushteti, ashtu dhe zbulimin e veprimtarisë së vetë Kryeministrit Rama në shkatërrimin 12 vjeçar të vendit dhe vjedhjeve të paskrupullta, pa një të keqe deklaroi para strukturave të partisë se SPAK-un e krijoi Partia Socialiste!
Iku Amerika nga ligjërimi i Edi Ramës ashtu si dhe Yuri Kim, dhe shqiptarëve iu shfaq vetëm “një hero i fëmijëve tanë” por tashmë ndonëse i lirë, me një lum akuzash si për Strukturën e Posaçme ashtu dhe vetë Kryeministrin nga dora e djathtë e tij, Zv/Kryeministri Arben Ahmetaj.
Pasi u akuzua nga SPAK, Zv/Kryeministri Ahmetaj arriti të arratiset para se të prangosej nga Struktura e Posaçme dhe nga arratia foli gjithçka por fjalën Sigurim i Shtetit nuk e nxori dot nga goja ashtu sikur se Hysni Kapo!
Foli për verën 33 mijë euroshe Romanée Conti që konsumon Edi Rama, kanabizimin e Shqipërisë me lejen e Kryeministrit, pronarin faktik të inceneratorit 100 milionë eurosh që nuk ekziston, dhe për heshtjen e SPAK-ut, por, jo dhe për qafën që lëviz këtë kokë kriminale!
Por, historia me Kryetarin e Bashkisë Tiranë, Erion Veliaj, i shkiti nga dora jo vetëm Kryeministri Edi Rama!
Pas vajtjes në Shtetet e Bashkuara, kur Perandoria Soros ra dhe në fronin e Presidentit të SHBA po ulej Donald Trump, Kryetari i Bashkisë Tiranë, Erion Veliaj, u kthye më i kthjellët pavarësisht se për Kryeministër kishte atë që e futi në politikë sepse i kishte shërbyer!
Lali Eri mund ta ketë futur në brug Saimir Tahirin që e kishte rival për kokë në Partinë Socialiste dhe pasardhës të Edi Ramës, por publikimi i dokumentave të Bashkisë Tiranë të cilën ai e drejtonte, mund ta bënte vetëm një saimir i tij!
U supozua Belinda Balluku ndërsa Lali Eri po shpëdhite nga qelia e burgut, dhe në opinion u krijua bindja se ishte Bela pasardhëse e Edi Ramës meqë Lali i kishte larë duart, pandehur Erion Veliaj e thotë qartë se ishte arrestuar nga Sigurimi i Shtetit!
Pavarësisht afeksionit të Lali Erit me gënjeshtrën, me këtë rast e tha një të vërtetë shumë të madhe e cila për pak ditë do bëhet edhe për opinionin publik!
Musketeri i tretë që shërbeu si frymëmarrje për ekzistimin dhe veprimin e Strukturës së Posaçme Kundër Korrupsionit dhe Krimit të Organizuar, por, që e përdori vetëm për qëllimet e veta për 6 vjet është, Sigurimi i Shtetit!
Sigurimi i Shtetit
Për fat të keq, pas 34 viteve tranzicion, kur shqiptarët filluan të mendojnë se ishin ata që i dhanë fund diktaturës së Enver Hoxhës, madje duke rënë në delir se kishin tërhequr zvarrë dhe bustin e tij, Sigurimi i Shtetit u shfaqet kudo, edhe aty ku Kryeministri u thotë se e krijuan amerikanët!
Po, Sorosi erdhi në Shqipëri por nuk e solli Saliu siç proklamojnë mediat nën kontrollin e qeverisë, që çuditërisht që të gjitha me licencë kombëtare janë të ekstremit të majtë, dhe nuk u takua me Saliun por me Ramiz Alinë, në atë kohë President! Dhe, nuk e solli as Ramizi, por, Sigurimi i Shtetit!
Edi Rama mund të ketë vjedhur ikona ashtu siç tha paraardhësi i tij Fatos Nano, por, është njeriu i vetëm në botë që shkon në varrimin e babait, dhe në vaki për babain që i ka vdekur bëhet ministër i Kulturës! Rrëfimet për këtë dukuri të rrallë politike vazhdojnë edhe sot, por, atë e emëroi dhe e futi në politik një dhe vetëm një, Sigurimi i Shtetit!
U akuzua si Kryeministër që bashkëpunon me krimin e organizuar që trafikon drogë, naftë dhe mallëra tjera të akcizës, si dhe ndërtues që pastrojnë para!
Sot askush nuk mund të mohoj ca aftësi të Edi Ramës por pas 45 vjet kontrabande të drogës, naftës, cigareve dhe mallërave të tjera të akcizës në emër të shtetit të Enver Hoxhës nga Sigurimi i Shtetit, kjo organizatë kriminale që mund të ketë bërë shumë çmenduri, nuk është e pakualifikuar deri në atë pikë sa ti dhuroj gjithë rrjetin e kontrabandës që kishte krijuar, një thonjëpapreri që Fatos Nano e solli nga Parisi; Aq më shumë kur të gjithë punonjësit e shërbimeve sekrete në shtetet e Lindjes vazhduan ta drejtojnë këtë kotrabandë, dhe, sot janë drejtuesit e këtij krimi të organizuar!
Dhe, nëse mendoni se është rastësi që ata që punuan në Sigurimin e Shtetit e dashurojnë biznesin e ndërtimit, atëherë vazhdoni të mendoni, nuk ju ndalon njeri, por, nëse mendoni ta bleni një apartament me çmim të volitshëm, fillimisht duhet të gjeni njeriun që njehë një sigurims!
Nga mbiu një agjent i Sigurimit të Shtetit për të lidhur zyrtarin e lartë të FBI, Chares McGonigal, me Kryeministrin Edi Rama, këtë pyetje mund ta bëjnë sot vetëm të paditurit; Si u përmbytën shoqatat e të përndjekurëve politikë me sigurimsa, ashtu si dhe ato të pronarëve dhe sindiktat, nuk janë më mistere, janë veprimtari ekskluzive të Sigurimit të Shtetit!
Dhe jo vetëm kaq! Pse sot SPAK kontrollohet nga Sigurimit i Shtetit kjo nuk është pyetje për asnjë qytetar të rëndomtë, por, për Partinë Demokratike dhe liderin e saj Sali Berisha që pretendon të marrë pushtetin, tashmë me kushtet reale pas fitores së Donald Trump dhe luftës së hapur kundër filantropit që prodhoi vetëm mizantropë shqiptarë, George Soros!
Nëse ky fakt shmanget pas 11 Majit ashtu sikur se u këshilluan të përndjekurit politikë në vitin 1992 që të shikojnë nga e ardhmja dhe të harrojnë krimet e kësaj organizate kriminale duke lënë të padënuar hetuesit, prokurorët dhe gjyqtarët e diktaturës, as PD-së dhe as Sali Berishës nuk i duhet pushteti, ashtu siç nuk i duhet Sigurimit të Shtetit kurrfare leje, as nga Kardinali Richelieu i Alexandre Dumas, as nga Edi Rama që edhe sot e ka të qartë se si bëhen të gjithë për SPAK, pa dëgjuar rënkimet e Lali Erit:
SPAK për të gjithë, të gjithë për SPAK!
