Spanja njeh pasaportat e Kosovës

Spanja i është shtuar sot listës së vendeve që njeh pasaportat e Kosovës, dhe tani mund të udhëtohet pa viza edhe drejt këtij shteti.

Lajmin e ka bërë të ditur Zv/Kryeministri i Kosovës, Besnik Bislimi, pasi është njoftuar nga Drejtoria e Përgjithshme për Migrim dhe Punët e Brendshme të Bashkimit Evropian, DF Home, se Spanja i njeh pasaportat e Kosovës.

“Lajmet e mira vazhdojnë. Për qytetarët tanë dhe shtetin. DG Home ka njoftuar se tashmë edhe Spanja i njeh pasaportat e Republikës së Kosovës. Pra mund të udhëtojmë pa viza dhe drejt këtij shteti.

Ndërsa me 1 janar nisi lëvizja pa viza, Spanja është destinacion që i shtohet vendeve të zonës Shengen ku mund të udhëtojmë përmes liberalizimit, e ku pengesë më herët ishte mosnjohja e pasaportës sonë,” tha Zv/Kryeministri i Kosovës, Besnik Bislimi, përmes rrjetit social duke përfunduar:

“Vazhdojmë tutje, për të sjellë lajme të tjera të mira, e që ndikojnë pozitivisht për qytetarët tanë.”