Spiunia ruse e papenguar për një dekadë në Komandën e NATO-s në Evropë!

Spiunia ruse futet në mesin e oficerëve të lartë të NATO-s në Itali (3)

Maria Adela për herë të fundit fiktivisht ka udhëtuar drejt Moskës në verën e vitit 2018. Me këtë rast, ajo ka udhëtuar me pasaportën e tretë ruse. Sikurse dhe në dy rastet tjera, kjo pasaportë kishte numrin serik të cilin i kishte ndarë shërbimi sekret ushtarak rus, GRU.

Jeta e saj aktive shoqërore u avullua, dhe askush nga të njohurit me të cilët kanë biseduar gazetarët nuk i kujtohet sa ajo i ka informuar për planet që të largohet përgjithmonë nga Italia, si dhe shkaqet e një vendimi të tillë.

I vetmi kujtim nga jeta e kaluar të cilin ajo e mori me vete, ishte macja. Maria Adela kishte një mace të zezë, Luisën, të cilën dy mikeshat e saj e përshkruan si të vetmen gjë stabël në jetën e saj.

Mirëpo, dy muaj pasi iku, publikoi edhe një shpallje enigmatike në profilin e saj në Facebook, duke aluduar se ishte e sëmurë nga kanceri. Shkruan se si flokët kanë filluar ti rriten pas kimioterapisë.

Në fakt, në momentin kur personi fiktiv që miqtë e saj të shokuar dhe shqetësuar e njihnin si Maria Adela e shkruan këtë mesazh, gruaja reale – zyrtarja e GRU me emrin Olga – kalonte kohën pranë timonit të makinës së saj të re Audi dhe duke mbikëqyr transferimin në banesën e saj të re luksoze në lagjen elitare të Moskës.

Pas më shumë se tre vjet nga zhdukja prej Napolit, më 4 dhjetor të vitit 2021, Maria Adela dërgoi edhe një mesazh enigmatik, kësaj radhe direkt në WhatsApp chat me Marcelle D’Argy Smith: “Më e dashura Marcelle! Janë shumë gjëra që nuk mundem (dhe kurrë nuk do të mundem) ti sqaroj! Por më mungon shumë dhe fortë shumë…”.

Lidhja e qartë e Maria Adelës me GRU

Bellingcat dhe partnerët e tij vërtetuan lidhjen e qartë të Maria Adelës me GRU nga fundi i vitit 2021, në bazë të disa treguesve që identitetin e saj dhe sjelljen e bëjnë në përputhje me veprimin e shërbimit sekret rus të ushtrisë.

E para, personi me këtë emër dhe datë të lindjes nuk ishte në asnjë bazë të dhënave ruse, duke përfshirë dhe bazën zyrtare të të dhënave të pasaportave, por emri i saj u shfaq në të dhënat e pasaportave dhe adresave nga viti 2007, ku më parë janë gjetur edhe oficer të të tjerë të GRU me identitet sekret.

Identiteti i saj i rremë ishte identitet i një personi me prejardhje të përzier e lindur në Amerikën e Jugut, që ishte mbulim i dashur i shërbimit të kundërzbulimit rus, SVR, dhe agjentëve të GRU, siç është dëshmuar kohë më parë me kapjen dhe deportimin e një zyrtari të GRU, që me vite ka jetuar në SHBA dhe Irlandë si brazilian me prejardhje gjermane.

Mirëpo, ishte e vështirë të zbulohet ndonjë gjurmë e identitetit të saj të vërtetë. Nuk kishte fotografi të këtij personi në rrjetet sociale ruse. Numrat e telefonit rus që ishin theksuar si kontakte për identitetin e saj të rremë ishin regjistruar si persona anonim. Ishte ky edhe një tregues i lidhjes së saj me shërbimin sekret, sepse të gjithë numrat në Rusi duhet të regjistrohen në emër të personave real.

Kërkimi i personave në bazën e madhe të të dhënave ruse për pasaporta nuk dha rezultate bindëse, mirëpo, analiza e detajuar e një prej personave të ngjashëm në përfundim rezultoi me identifikimin e personit real të personit që qëndron pas Maria Adelës.

Krahasimi i dy fotografive të Maria Adelës nga vitet e ndryshme me fotografinë e vjetër nga pasaporta e shtetases ruse, 40-vjeç, me emrin Olga Kolobova, në pajisjen e Microsoft, Azur, dha rezultate.

Vërtetë, përputhja jovizuale në mes të dy personave së shpejti u bë jashtëzakonisht intriguese. E para, Olga Kolobova nuk kishte kurrfarë gjurme dixhitale në Moskë para vitit 2018. Asnjë regjistrim i adresës, shkelje në trafik ose regjistrim të numrit të telefonit nuk u zbuluan në asnjë nga dhjetëra bazat e të dhënave në Moskë.

Mirëpo, ky person kishte një prani shumë aktive dixhitale nga nëntori i vitit 2018, përafërsisht në kohën kur Maria Adela u kthye në Moskë.

Olga Kolobova

Duke përdor baza të vjetra të të dhënave nga qytetet jashtë Moskës,  Bellingcat  më në fund arriti të zbuloj praninë e kaluar dixhitale të Olgës, deri në vitin 2005, kur në moshën 23 vjeçare regjistroi kompaninë për tregtimin e alkoolit në rajonin Krasnodar në Rusi.

Duke ndjekë adresën e saj të lajmëruar në atë kohë, arritën të gjejnë dhe gjurmët e babait të saj. Zbuluan se nga pensionimi në vitin 2007 ai ishte shef i Fakultetit Ushtarak në Universitetin e Uralit në Jekaterinburg.

Edhe më intriguese është se në web faqen e institucionit të tij u gjet se si koloneli i forcave të armatosura ruse kishte marrë shumë dekorata e medalje “për shërbim ndaj atdheut jashtë shtetit, dukë përfshirë Angolën, Irakun dhe Sirinë.”

Bazuar në të dhënat e investigimeve të kaluara, spiunë të GRU shpesh janë rekrutuar ndër fëmijë të oficerëve të lartë ushtarak, dhe kjo ka përforcuar edhe më shumë mundësinë se Maria Adela dhe Olga ishin i njejti person.

Këtë hipotezë gjithashtu e përforcoi fakti se Olga Kolobova u bë pronare e dy banesave në Moskë në periudhën kur Maria Adela ishte në Rusi. Në të njëjtën kohë, të dhënat e furnizimit me ushqim nga Yandex Food tregojnë se Olga gjatë orarit të punës ka porositur ushqim në adresën ku ndodhet Fondi rus i pensionimit. Me supozimin se punon si nëpunëse në Entin pensional, prejardhja e mjeteve të konsiderueshme për përvetësimin e banesave të reja me vlerë disa miliona euro ishin të paqarta.   

Me gjithë këto gjurmë, Bellingcat duke kërkuar nga spiunët e tij që kanë akses në bazën ruse të të dhënave  për patent shoferi, arriti të marrë fotografi të freskët të Olga Kolobovës. Fotografia për të cilën mendohet se është e vitit 2021u bë lidhja bindëse në mes të personit Maria Adela dhe Olga Kolobova.

Mirëpo, softweri për njohjen e personave nuk ishte shumë bindës që të dëshmoj se bëhet fjalë për të njëjtin person.

Më pas, gazetarët kërkuan numrin e telefonit të Olgës në WhatsApp dhe gjetën dëshminë e fortë se Olga dhe Maria Adela vërtetë janë i njëjti person.

Fotografinë të cilën Maria Adela e kishte përdor për Facebookun e saj ishte përdor gjithashtu edhe nga Olga në profilin e saj në WhatsApp. Maria Adela gjithashtu ka publikuar të njejtën fotografi në faqen e saj në Instagram. Për rikonfirmim, gazetarët vendosën të gjejnë metatëdhënat e regjistrimeve telefonike për numrin e Olga Kolobovës.

Dekada e shërbimit të Olga Kolobova

Në Ditën e veteranëve të atdheut në Rusi, 23 shkurt 2022, i cili në mënyrë masive shënohet ndër ushtarë dhe oficerë, Olga thirri numrin i cili ishte i njohur për ekipin investigativ të Bellingcatit. Ishte numri i komandantit të njëjtë nga Departamenti 5 i GRU i cili kishte thirr në mesnatë gjeneralin Averjan, katër vite më parë.

Gati një dekadë shërbim e Olga Kolobova si agjente, jashtëzakonisht është e ngjashme me rastet e njohura të spiunëve sekret rus, për disa arsye. Njëri prej tyre është ndërprerje e papritur e aktivitetit të saj, dhe nuk e kishte kapur shërbimi i huaj i kundërzbulimit. Kjo lenë të hapur çështjen nëse GRU qëndrimin e saj në Evropë e përjetoi si sukses ose mossukses. Krahasuar me personat e njohur ilegal rus që me dekada kanë jetuar në Perëndim dhe kanë arritur të vendosin vetëm rrjete margjinale interesante, rrjeti i të njohurve të Maria Adelës ndër oficerët e NATO-së dhe forcat detare amerikane, duket mbresëlënës.       

Gjat angazhimit të saj, Kolobova disa herë ka udhëtuar  nën maskën e vizitës së ekspozitave dhe miqve nëpër gjithë Evropën, Bahrein, e ndoshta edhe Tailandë. Kjo aftësi në vetvete mund të jetë e dobishme për GRU.

Nuk ka dëshmi se shërbimet perëndimore të kundërzbulimit ose shërbimi i brendshëm i sigurisë i NATO-s ishin të ndërgjegjshme për prezencën e spiunes ruse strategjikisht afër Qendrës së Komandës së NATO-s në Evropë. Asnjërit prej të njohurve të Maria Adelës, as NATO dhe as policia nuk i është afruar për të biseduar për ndërveprimin me agjenten ruse./Index/