Strasburg, sot firmoset vendimi për liberalizimin e vizave për Kosovën

Sot në Strasburg pritet të firmoset Vendimi i Bashkimit Evropian për liberalizimin e vizave për Kosovën.

Në një ceremoni e cila pritet të fillojë në orën 14:45, Presidentja e Parlamentit Evropian, Roberta Metsola, dhe përfaqësuesja e Suedisë si kryesuese e Presidencës së BE-së, do ta firmosin zyrtarisht vendimin për liberalizim. I pranishëm në këtë ceremoni do të jetë dhe Zv/Kryeministri për Integrim Evropian, Zhvillim dhe Dialog i Kosovës, Besnik Bislimi.

Në orën 15:15 është parashikuar që eurodeputeti dhe Raportuesi për Kosovën për çështjen e vizave, Thijs Reuten, së bashku me Zv/Kryeministrin për Integrim Evropian, Zhvillim dhe Dialog i Kosovës, Besnik Bislimi, do të mbajnë një konferencë për media në Parlamentin Evropian.

Ndryshe, dje Parlamenti Evropian e miratoi vendimin për vizat, duke përmbyllur procedurat vendimmarrëse për këtë çështje. Miratimi u bë pa votim, pasi nuk kishte asnjë kundërshtim.

Kështu me firmosjen e këtij Akti ligjor, botimin e vendimit në Gazetën Zyrtare të BE-së dhe hyrjen në fuqi, qytetarët e Kosovës do të mund të lëvizin pa viza në vendet e Zonës Shengen prej 1 janarit të vitit 2024.