Strehoi 80 persona, Ukraina: Rusia bombardon xhaminë Sulltan Sylejmani i Madhërishëm

Forcat ruse kanë bombarduar xhaminë Sulltan Sylejmani i Madhërishëm në Mariupol, ku janë strehuar më shumë se 80 të rritur dhe fëmijë, përfshirë shtetas turq, bënë të ditur Ministria e Jashtme e Ukrainës.

Ukraina, raporton RFe, ka akuzuar Rusinë se nuk po lejon daljen e qytetarëve nga Mariupoli, dhe për pasojë qindra mijëra persona kanë mbetur të bllokuar.

Rusia fajëson Ukrainën se ka dështuar në përpjekjet për evakuim.

Ende nuk ka informacion nëse është vrarë apo plagosur dikush brenda xhamisë.

Moska, në anën tjetër, hedh poshtë vazhdimisht raportimet për shenjëstrim të civilëve.

Sulmi i Moskës ndaj Ukrainës ka nisur në orët e para të 24 shkurtit. Presidenti rus, Vladimir Putin ka urdhëruar “operacion special” për të çmilitarizuar Ukrainën.

Konflikti ka nxitur mbi 2.5 milionë refugjatë që të largohen nga shteti.

Veprimi i Kremlinit ka nxitur zemërim dhe është dënuar në shumë vende të botës, raporton RFE ndërkohë Shtetet e Bashkuara dhe Aleatët janë përgjigjur me sanksione të ashpra kundër Moskës.