Stuhia Ciaran iku reshjet e shiut vazhdojnë, ja situata sot

Pamjet apokaliptike që solli stuhia “Ciaran” edhe në vendin tonë, la pas dëmtime të rënda, por për fat të mirë nuk kishte lëndime në njerëz ndërsa reshjet intensive të shiut vazhduan.

Reshjet e dendura të shiut dhe era e fortë që vazhdoi gjatë gjithë natës shkaktoi problematika në qytete të ndryshme të vendit duke lënë të bllokuara edhe shumë akse rrugore ndërsa Autoriteti Rrugor Shqiptar raporton se grupet e punës së mirëmbajtjes kanë qenë në terren duke punuar për të sigurar qarkullim normal në të gjitha akset nacionale.

“Gjatë natës reshjet e shiut kanë vazhduar në të gjithë vendin shoqëruar me stuhi dhe erë duke sjellë rënie gurësh e materialesh në trup të rrugës si në akset: Skuraj-Peshkopi, Hani i Hotit–Tamarë, Bogë–Theth, Kukës–Shishtavec, Vau Dejës–Pukë, Bajram Curri–Valbonë, Qafë Mali-Fierzë, Bujan–Qafë Morinë, Elbasan–Qafë Thanë dhe Përmet–Çarshovë ku tashmë rrugët janë pastruar dhe lëvizja e mjeteve kryhet normalisht,” raporton ARRSH.

Ministria e Infrastrukturës dhe Energjisë, MIE, siç duket sot është e pashqetësuar meqë nga dje në orën 19:00 nuk ka raportu për situatën në vend, kur u tha se nuk janë në funksion 64 fidera, kryesisht në zona rurale.

“Të gjitha linjat 35kV janë në funksion të plotë, përveç aksit Rrogozhinë-Divjakë. Gjithashtu plotësisht në funksion është edhe rrjeti i cili furnizon me energji elektrike institucionet e rëndësisë së veçantë. Rrjeti i OST, kryesisht linjat 110kV janë afektuar nga disa avari kalimtare, duke sjellë ndërprerje të furnizimit me energji elektrike me kohëzgjatje deri në 10 min. Tashmë të gjitha nënstacionet janë funksion të plotë.”

Kështu, dhe në Tiranë një ditë pasi Lana doli nga shtrati dhe u bllokuan disa akse poshtë krenarisë rilindase “Piramidës” deri tek Pallati me Shigjeta si dhe Rruga e Elbasanit, sot situata është nën kontroll dhe pa probleme. Ndërkohë, probleme aktualisht ka në disa qarqe të vendit.

Në Qarkun Kukës ka pasur rrëshqitje dherash, në akset nacionale. Akset problematike mbeten Kukës-Shishtavec, Kukës- Peshkopi, Bajram Curri- Qafë Mali dhe Qafë Mali- Kukës.

Si pasojë e reshjeve, në Qarkun Dibër, vijon të ketë probleme në kalimin e Rrugës së Arbrit ku niveli i asfaltit është ulur, ndërsa raportohet për një banesë të dëmtuar nga reshjet.

Po ashtu probleme kanë njësitë e thella, si Lura, Kalaja e Dodës, etj.,  ku ka pasur rrëshqitje gurësh. Era e fortë ka shembur pemët dhe si pasojë janë dëmtuar shtyllat duke u ndërprerë energjia elektrike në disa zona. Në fshatin “Fshat”, ka pasur çarje të asfalti, ndërsa shtabi i emergjencave  është në gatishmëri të plotë.

Në Qarkun Shkodër deri në orët e para të mëngjesit kanë vijuar reshjet e dendura të shiut të shoqëruara me shtrëngata dhe dalje te përrenjve nga shtrati i tyre të cilët krijuan probleme.

Fshati Theth, fshati Nderlysaj si pasojë e daljes nga shtrati të përroit u bllokua segmenti Theth- Nderlysaj, ndërsa në fshatin Buzhale të Bashkisë Pukë, si pasojë e rrëshqitjes së dherave u dëmtua kabina e këtij fshati duke ndërprerë energjinë elektrike në disa rrugë nacionale, ku ka pasur rënie inertesh.

Gjate ditës sotme sipas raportimeve nga bashkitë, situata është si më poshtë:

Autoriteti Verior nuk raporton probleme në akset rrugore që mbulon DRV Shkodër. Gjatë natës si rezultat i reshjeve të shiut ka pasur rënie të inerteve dhe gurëve nga skarpatet por pa shkaktuar probleme në qarkullim. Kontraktorët janë në gatishmëri me mjete e fuqi punëtore.

Në Bashkinë Shkodër të tre segmentet e bllokuara nga shembjet e dheut në rrugën e Thethit u zhbllokuan. Raportohen për ndërprerje të energjisë elektrike në disa fshatra të njësive Shkrel e Kelmend.

Nuk raportohet për bllokim të rrugëve nacionale apo rurale.

Në bashinë Pukë vazhdon të këtë reshje të dendura shiu, fshati Buzhalë ka ndërprerje të energjisë si pasojë e dëmtimit të kabinës elektrike, ndërprerje të energjisë kanë dhe Njësitë Administrative Rrape dhe Gjegjan.

Në Bashkinë Vau Dejës, njësia Administrative Bushat nuk ka probleme të EC por ka shkëputje të energjisë elektrike herë pas here në fshatin Bushat dhe Barbullush, Njësia administrative Hajmel nuk ka probleme, Njësia Vig Mnele ka rënie gurësh në fshatin Mnele e Madhe, ndërsa në Njësitë Administrative Temal dhe Shllak nuk ka energji elektrike në të gjitha fshatrat e njësive.

Në Qarkun Lezhë, situata aktualisht paraqitet e qetë, pa problematika. Reshjet e shiut kanë vazhduar me intensitet të ulët, herë-herë me intensitet deri mesatar afat shkurtër, deri në orën 08:00, sipas Shërbimit Meteorologjik Ushtarak, Gjadër ka pasur 44 mm shi të shoqëruar me erë me intensitet deri mesatar

Si pasojë e reshjeve të dendura gjatë natës uji ka bllokuar një familje në fshatin Rraboshtë, Njësia Administrative Kallmet. Strukturat e Emergjencave Civile të Bashkisë Lezhë, me mjete janë nisur për zhbllokimin e kanalit.

Nga strukturat e Emergjencave Civile të Bashkisë Lezhë, Kurbin dhe Mirditë nuk raportohen probleme. Furnizimi me ujë të pijshëm raportohet normal ndërsa ai me energji elektrike thuhet se ka në të gjitha zonat rurale. Kuotat e lumenjve Drin e Mat janë në nivele minimale.

Gjatë orëve të natës ka pasur reshje shiu me intensitet mesatar edhe në Qarkun Elbasan ku deri në mëngjesin e sotëm kanë arritur në 50mm. Situata në qark paraqitet pa shumë problematika.

Akset rrugore Elbasan-Q.Thanë, Gramsh-Moglicë, Elbasan-Gjinar, Librazhd-Stërblevë kanë pasur rënie inertesh e gurësh. Disa akse rurale të bashkisë Librazhd dhe te bashkisë Gramsh e Cërrik kanë pasur inerte dhe depërtim të ujerave në rrugë. Prurjet e lumenjve e përrenjve janë në nivel mesatar.

Ka pasur ndërprerje të furnizimit me energji elektrike në një pjesë të qytetit të Peqinit, rrethinat e Cërrikut, në Labinot Mal, Funarë, bashkia Elbasan, Njësia administrative Shalës e Mollas bashkia Cërrik, Nj.A Orenjë e Stëblevë, bashkia Librazhd dhe Nj.A Porocan bashkia Gramsh. Është duke u punuar për riparimin e defekteve.

Në Qarkun Fier gjatë natës ka pasur reshje shiu me intesitet mesatar deri në të lartë i shoqëruar dhe me erë të fortë. Nga strukturat e Emergjencave Civile pranë 6 bashkive si dhe D.V.Policisë Fier raportohet: Rrugët nacionale dhe rurale janë të aksesueshme normalisht. Nuk raportohen problematika lidhur me furnizimin me ujë. Nuk raportohen njësi ekonomike të dëmtuara sera , stalla, apo bagëti. ⁃Nuk raportohen sipërfaqe të përmbytura.

Raportohen mungesa energjie vetëm në bashkinë Fier si rezultat i nxjerrjes jashtë pune të këtyre fiderave: Fideri i Mbrostarit; Fideri i Daullasit; Fideri i CO2; Fideri 20; Fideri tek Pularia

Edhe ditën e sotme kanë vijuar reshjet në Qarkun Gjirokastër. Problematika kryesisht ka pasur në Përmet, ku u bllokuan 23 turistë në Kanionin e Langaricës, por u evakuuan disa orë më pas pa lëndime.

Moti i keq që ka përfshirë edhe Qarkun e Korçës, por deri tani nuk janë shkaktuar përmbytje. Ka pasur vërshime të ujit, por nuk janë shkaktuar problematika.

Aktualisht situata është nën kontroll, ndërsa gjatë mbrëmjes nga era e fortë në Pedonale, është shkëputur një pjesë suvaje, dhe ka rënë mbi tendën e një lokali. Si pasojë ka mbetur i plagosur lehtë një person në shpatull.