Sulmi fantastik i Francës kundër mbrojtjes së hekurt të Uruguait

Uruguai ka dëshmuar nga ndeshjet e deritanishme se ka mbrojtjen më të fortë sidomos në fazën e grupit nuk kishte pësuar asnjë gol.

Në kuadër të grupit A, Uruguai shënoi tri fitore, 1:0 ndaj Egjiptit, 1:0 kundër Arabisë Saudite dhe 3:0 me Rusinë, duke zënë vendin e parë me 9 pikë.

Në të tetën e finales, Uruguai mundi 2:1 Portugalinë e Ronaldos, duke u kualifikuar në çerekfinale, ku sot në orën 16.00 ndeshet me Francën që ka sulmin më të mirë aktualisht në botë në krye me Mbappen, Giroudin e Griezmannin.

Franca ka pasur ecuri të mirë në grupin C, e cila fillimisht e kishte mundur me 2:1 Australinë, me pas me 1:0 Perunë dhe u nda baras (0:0) me Danimarkën, duke u renditur në krye të grupit me 7 pikë.

Në të tetën e finales e mundi me 4:3 Argjentinën e Messit. Në ballafaqimin Uruguai – Francë pritet lojë e fortë, sepse uruguajanët do të mundohen përmes mbrojtjes të ndalin sulmin e Francës.

Sulmi fantastik i Francës do të përpiqet të gjejë një mënyrë për të mposhtur mbrojtjen e hekurt të Uruguait.

19-vjeçari,  Mbappe shënoi dy gola kundër Argjentinës duke u bërë “adoleshenti” i parë që e bën diçka të tillë në një Kupë Bote, që pas Peles në vitin 1958. Por krahas golave, sulmuesi i talentuar u bë protagonist në fillim të ndeshjes kur pas një sprinti të jashtëzakonshëm prej 70 metrash fitoi penallti.

“Mu duk sikur Mbappe kishte hipur në një skuter”, bëri shaka shoku i tij te Franca, Florian Thauvin. Me dyshen e Atletico Madridit në qendër Jose Gimenez dhe Diego Godin, skuadra e Tabarez duket nga ato të pakta përfaqësuese që mund të ndalin Mbappen dhe shokun e tyre në La Liga, Griezmann.

“Nuk duam t’i lëmë hapësira dhe t’ia vështirësojmë sa më shumë punën sulmuesve të tyre, si e vetmja mënyrë për të mposhtur Francën” – tha mesfushori Diego Laxalt. Duke u bazuar edhe te forma e mirë e sulmuesit Luis Suarez, Uruguai shpreson të përsërisë vitin 2010 kur shkoi deri në gjysmëfinale, por duket se nuk do të ketë në radhët e tyre Edinson Cavani, autori i dy golave ndaj Portugalisë, por që ka pësuar një tërheqje muskulore.

“Gjelat” do të synojnë të frymëzohen nga 20-vjetori i suksesit të tyre të vetëm në Kampionatin Botëror – “France 98”, ndërsa Uruguai ka qenë dy herë kampion bote (1930 dhe 1950).

Skuadra fituese do të ndeshet me Brazilin ose Belgjikën në gjysmëfinale.  Franca do të luajë për herë të shtatë në një çerekfinale të Kupës së Botës, ku ka fituar katër herë dhe është eliminuar dy herë.

Uruguai ka fituar në çerekfinale ndaj Anglisë në vitin 1954, ndaj Bashkimit Sovjetik në vitin 1970, ndaj Ganës në vitin 2010, por është mposhtur 4-0 nga Gjermania në vitin 1966.

Franca është kualifikuar dy herë me penallti dhe ka humbur dy herë gjatë historisë së Kupës së Botës, e fundit kundër Italisë në finalen e vitit 2006. Uruguai ka pasur vetëm një herë nevojë për 11-metërshat dhe fati i buzëqeshi kundër Ganës, tetë vjet më parë në Johanesburg.

Të dyja këto skuadra e mbyllën në vendin e parë grupin e tyre në Rusi 2018, por teksa Franca ka tri fitores dhe një barazim në këtë veprimtari, Uruguait mund të krenohet me faktin se bashkë me Belgjikën janë të vetmet skuadra që i kanë fituar të gjitha ndeshjet e luajtura deri tani. Franca nuk do të ketë në radhët e saj mesfushorin e shkualifikuar Blaise Matudi, ndërsa katër futbollistë rrezikojnë shkualifikimin në rast se marrin karton të verdhë Olivier Giroud, Benjamin Pavard, Paul Pogba dhe Corentin Tolisso. Te Uruguait i vetmi që rrezikon shkualifikimin është Rodrigo Bentancur.

E premte

Uruguai-Franca   16.00

Brazili-Belgjika    20.00

E shtunë

Suedia-Anglia      16.00

Rusia-Kroacia      20.00