Sulmi në Banjskë i një bande terroristësh, Baerbock: Serbia të sqarojë rrethanat!

Në përfundim të ministerialit të ministrave të Jashtëm të Procesit të Berlinit në Tiranë, Ministrja e Jashtme e Gjermanisë, Annalena Bearbock, e bëri të qartë se sulmi ndaj policisë së Kosovës më 24 shtator u krye nga një bandë terroristësh dhe Serbia duhet të sqarojë rrethanat ashtu si edhe dhunimin e ushtarëve të KFOR-it në veri.

E ardhmja e Ballkanit Perëndimor është në Bashkimin Evropian, ishte e prerë shefja e diplomacisë gjermane ndërsa i bëri thirrje për përshpejtimin e procesit të integrimit.

“Duhet të shmangim njëherë e mirë shkëndijat e vjetra të zjarrit dhe vatrat e konfliktit. Provokimet e palës serbe përmes rritjes së trupave ushtarake në kufirin me Kosovën e kanë nxehur edhe më tej situatën. Për këtë biseduam gjatë këtij takimi. Kjo vjen pas një sulmi tinëzar ndal policisë së Kosovës prej një bande terroriste të armatosur deri në dhëmbë. Presim nga Serbia të çojë përpara proceset hetimore të ngjarjeve të 24 shtatorit dhe të kontribuojë në sqarimin e rrethanave ashtu sikundër dhe për ngjarjet e majit për dhunën ndaj KFOR,” tha Annalena Bearbock në Tiranë duke sqaruar dhe mesazhin e Perëndimit për shtetin serb por nuk i dha rëndësi vendimit të ministrit të Punësve të Jashtme, Ivica Daçiç, të largohet nga fotoja familjare pse aty ishte homologia e tij kosovare, Donika Gërvalla!

“Përmes rritjes së trupave të NATO ne japim një mesazh shumë të qartë që qëndrojmë vigjilentë dhe kontribuojmë në terma afatgjatë për stabilitet dhe të ardhmen e rajonit e kemi përzemër. Por çelësi i zgjidhjes është në Beograd dhe Prishtinë.”

Në fund, duke përsëritur se e ardhmja e Ballkanit Perëndimor është në BE, Ministrja e Jashtme e Gjermanisë, Annalena Bearbock, tha se nëse Evropa nuk vjen këtu, ata do të gjejnë rrugë për të shkuar drejt saj.

“Është një entuziazëm për Evropën në këtë rajon. Është e qartë që e ardhmja e tyre, e rinisë së këtyre vendeve është në Evropë. Nëse Evropa nuk vjen këtu, ata do të gjejnë rrugë për të shkuar drejt saj, siç dhe e kanë bërë. Ndaj duhet të përshpejtojmë procesin e integrimit,” tha shefja e diplomacisë pa harruar dhe një mesazh për të rinjtë.

“Ata dëshirojnë të çlirohen nga zinxhirët e së shkuarës dhe të kenë perspektivën për të ardhmen e tyre. Hapja e një dege të Kolegjit të Europës në Tiranë, një institucion simbol europian, tregon se Shqipëria ka mbërritur e sigurt në familjen tonë europiane. Po ashtu Gjermania do të alokojë 300 mijë euro, në fondin për ndërtimin e urave mes artistëve të rinj në Ballkanin Perëndimor, duke hapur një rrugë të pajtimit.

Për herë të parë të rinjtë pa qenë nevoja të investojnë shumë mund të vizitojnë njëri-tjetrin. Diplomat e tyre janë njësoj të vlefshme. Ne duam të ecim krah për krah me ju në rrugën drejt BE-së. Për këtë lipsen reforma të reja dhe të domosdoshme në rajon, por edhe që ne të përpiqemi bashkërisht brenda për brenda BE-së. Ka ardhur koha që BE të mbajë premtimet që kemi dhënë para shumë kohësh”, shtoi ajo.