Tabaku: Me PD, biznesit do t’i hiqet gjoba e aferës korruptive të fiskalizimit

Një ndër masat që do të marrë Partia Demokratike për të ndihmuar biznesin menjëherë pas 25 prillit do të jetë heqja e pagesës korruptive të fiskalizimit. Kështu u shpreh Drejtuesja Politike e PD në Degët 2,3 dhe 10 në Tiranë, Jorida Tabaku, në takim me biznesin.

“Ata që kanë paguar deri tani këtë nga 400 deri në 2000 euro për këtë afere korruptive, do t’i marrin paratë mbrapsht,” tha Jorida Tabaku në takim me tregtarët në Tregun Çam në Tiranë.

Biznesmeni: Një pyetje kam unë. N.q.s. juve do e merrni, çfarë do të bëhet me sistemin e ri te fiskalizimit?

Jorida Tabaku: Një biznes paguan 400 deri në 200 euro shtesë në vit për sistemin e ri të fiskalizimit, që është aferë korruptive. Asnjë biznes nuk do ta implementojë sistemin korruptiv të fiskalizimit.

Biznesmeni: Unë p.sh. që e kam marrë me detyrim? Sepse ishte të 7600 subjektet e përzgjedhura.

Jorida Tabaku: Të parat? Nuk do të zbatohet sistemi i fiskalizimit.

Biznesmeni: Ajo pagesa që u bë, quhet?

Jorida Tabaku: Është e panevojshme dhe bizneset nuk do të kenë asnjë kosto nga kjo. Do të rimbursohen ato biznese që e kanë nisur instalimin.

Tregtaret i thanë Tabakut se mezi po kalojnë muajin dhe se po mendojnë edhe t’i mbyllin dyqanin e të largohen nga vendi, si rruga e vetme që u ka mbetur në një kohë kur politika vijon t’i injorojë problemet e tyre.

Por ish-deputetja premtoi se situata do të ndryshojë me zgjedhjet e 25 prillit dhe asnjë politikan nuk do të mund ta përdorë me pushtetin për interesat e tij dhe të një grupi klientësh, pasi në fokus do të jetë qytetari dhe biznesi i ndershëm.

Biznesmeni: Është biznes familjar dhe ne me këtë mbajmë familjen, kemi dy fëmijë në familje dhe me këtë mbajmë familjen.

Jorida Tabaku: E kuptoj.

Qytetarja: Dhe tani shiheni dhe vetë se si është.

Pas pandemisë d.m.th. nuk është se kemi jetuar, por kemi mbijetuar, me shumë sakrificë më thënë të drejtën…

Jorida Tabaku: Shikon nëpër televizorë dhe nëpër media sikur Shqipëria sot është në një bum të madh ekonomik, ndërkohë që realiteti është ky që flasim.

Biznesmeni: Ne jemi shtresa e mesme, jemi biznesi i vogël. Jemi të vetëpunësuar, mbahemi vetë. Nuk e di por, o ne do ikim nga ky vend…

Jorida Tabaku: Jo, përndryshe këtu vdes shpresa.

Biznesmeni: Këtu ka vdekur shpresa.