Tahiri: Oligarkët ndërtojnë 3 herë një shkollë/ I drejtohet ky mesazh Erjon Veliajt…
Sajmir Tahiri, gjatë konferencës për mediat, nuk ka lënë askënd pa akuzuar. Në fjalimin e tij ai ka përmendur Presidentin Ilir Meta, Kryeministrin Rama, ministrin e Brendshëm Xhafaj, për të vijuar me drejtuesit e opozitës, ambasadorët, madje deri tek Erjon Veliaj, Kryetarin e Bashkisë së Tiranës.
Tahiri dhe Veliaj kanë pasur një rivalitet të fortë mes tyre prej vitit 2013, ku të dy pas fitores së PS-së në zgjedhjet e atij viti u përfshinë në kabinetin qeveritar. Tahiri morri detyrën e ministrit të Brendshëm, ndërsa Veliaj atë të ministrit të Çështjeve Sociale.
Përplasjet mes tyre apo mbështetësve janë të njohura në rradhët e socialistëve, madje shpesh ato janë konsideruar rivalë edhe për atë që konsiderohej si pasardhësi i Edi Ramës në krye të PS-së.
Por, pas nisjes së hetimit ndaj Tahirit, si i dyshuar për përfshirje në narko-trafik, “Lali Erit” iu pastrua rruga nga pengesa e tij më e madhe.
Por në konferencën e sotme për mediat, Tahiri përmendi si një pengesat kryesore për integrimin e Shqipërisë në Bashkimin Europian, edhe “mungesën e zhvillimit ekonomik. Një ekonomi që mendon më shumë për oligarkët, të cilët ndërtojnë tre herë një shkollë me paratë e qytetarëve…”.
Ndoshta mesazhi i Tahirit i drejtohet drejtpërsëdrejti Erjon Veliajt, i cili është akuzuar për dhënien e lejeve të ndërtimit, ndërsa është mburrur për ndërtimin e shkollave dhe kopshteve.
