Takimi i Bashës në Korçë, Rama: Lus Zotin që këta njerëz të mos përfundojnë spitaleve! Reagon PD…

Edhe sot Kryeministri Edi Rama ka reaguar pas takimit të radhës së Kryetarit të Partisë Demokratike, Lulzim Basha, që zhvilloi në Korçë duke e cilësuar si tjetër faj të shëmtuar të infektimit masiv. Nuk vonoi shumë dhe Rama mori përgjigje nga Partia Demokratike e cila sjelljen e Kryeministrit e cilëson si panik të humbjes.

“Sot në Tiranë, ku vazhdon vaksinimi masiv e në Korçë, ku u krye një tjetër faj i shëmtuar infektimi masiv! Lus Zotin që për dy a tre javë që i duhen virusit të kapë rrugët e frymëmarrjes, këta njerëz të verbër e të keqpërdorur, të mos përfundojnë spitaleve për mullaqet e Lulëzimit e për mustaqet e Saliut,” thekson Edi Rama duke reaguar përmes rrjetit social Facebook.

Reagimi i plotë:

“Të gabosh është njerëzore, të këmbëngulësh në gabim është djallëzore”, thoshin latinët.
Kjo këmbëngulje prej shejtanbudallai në fajin e kërcënimit të shëndetit të njerëzve për interesin mizerabël të një fushate edhe më mizerabël, me makina, bori, zhurmë e turmë, duke bërë përshesh në çdo shesh, është një djallëzi prej njerëzish pa vizion, pa karakter, pa përgjegjësi e as fije njerzillëku.
*Sot në Tiranë, ku vazhdon vaksinimi masiv e në Korçë, ku u krye një tjetër faj i shëmtuar infektimi masiv.
(Lus Zotin që për dy a tre javë që i duhen virusit të kapë rrugët e frymëmarrjes, këta njerëz të verbër e të keqpërdorur, të mos përfundojnë spitaleve për mullaqet e Lulëzimit e për mustaqet e Saliut).

I menjëhershëm ishte reagimi i Partisë Demokratike duke e konsideruar panik të humbjes, pasi Edi Rama shqetësohet çdo ditë për mikpritjen e shqiptarëve për Lulzim Bashën dhe e ka kuptuar se që shqiptarët duan ndryshimin dhe askush nuk e ndal dot më këtë.

Përgjigja e PD:

I kapur mat në panikun e humbjes, Edi Rama shqetësohet çdo ditë për mikpritjen e shqiptarëve për Lulzim Bashën.
Edi Rama e ka kuptuar që shqiptarët duan ndryshimin dhe askush nuk e ndal dot më këtë.

Humbja e zgjedhjeve e ka bërë nervoz dhe për këtë ai sulmon takimet tona elektorale.

PD është parti që funksionon sipas rregullave dhe ligjeve në fuqi.

Kërcënimet dhe keqinformimet e Edi Ramës nuk e ndalojnë dot rrugën drejt fitores së Partisë Demokratike.
Në 25 prill Rama do të humbë dhe Shqipëria do të fitojë.