Të ngjashmit e Bashës në zgjedhjet e 14 Majit, Berisha: Një kandidat, një pallat!

Një kandidat një pallat! Kështu e vlerësoi sot Kryetari i Partisë Demokratike, Sali Berisha, paralajmërimin e mbështetësve të Lulzim Bashës për javën e ardhshme se do të publikojnë kandidatët për zgjedhjet lokale të 14 Majit, ndërsa përshëndeti deklaratën e KE për protestën e 6 dhjetorit i bëri thirrje qytetarëve që ta dalin dhe të shprehin mbështetjen për vlerat evropiane.

Sot në konferencën e përjavshme kur janë publikuar tashmë kandidaturat e të ngjashmëve të Lulzim Bashës, për Mallakastër, Agron Kapllanaj, për Lezhën Sandër Marku, për Dibrën, Naim Gazidede, dhe për Kuçovën, Ilir Koxhaj Kryetari i PD i cilësoi pa diskutim si njër të Edi Ramës me qëllim të dëmtimit të Partisë Demokratike.

“Nuk ka asnjë diskutim që PD del me një kandidat. Çdo kandidat tjetër që del, del në emër të Ramës për të dëmtuar PD-në. Kjo u takon shqiptarëve të thonë fjalën e tyre. PD del me një kandidat të zgjedhur me primare.

Absolutisht vetëm të Edi Ramës. E di ti sa tendera ka fituar Kapllani? Ka fituar me dhjetra tendera, përfshi pallatet ku u krijua keqtrajtimi më i shëmtuar ndaj qytetarëve te 5 Maji. Nuk ka forcë që ta tërheqë PD-në nga tenderat. PD është opozitë e vërtetë dhe jo grup i tendermenëve. Kapllani ka një listë shumë të gjatë tenderash nga pushteti qëndror dhe vendor.

Ai është i detyruar. Atë e telekomandojnë. Atij i japin para. “Një kandidat një pallat” është në masën 80-90% e vërtetë. Këta janë të tillë, nuk kanë asgjë të përbashkët me popullin opozitar. Ju e patë se si ishin përzierë aksionet. Nëse ka një akt të vërtetë makbethian të Ramës ishte përfshirja e kreut të opozitës në aferën e Durrësit,” tha Sali Berisha për të cilin projekt kishte një mesazh të qartë për të gjithë ata që e mendojnë të ardhmen e tyre duke investuar në Portin e ri të Durrësit i cili kaloi në parlament në orët e para të ditës së sotme:

“Ne, edhe njëherë, garantojmë se këtë projekt nuk do e lejojmë. U bëjmë thirrje qytetarëve shqiptarë, mos shpenzoni asnjë lek në këtë zonë krimi gjigant. U bëjmë thirrje kompanive shqiptare, mos u bëni ortakë në këtë vjedhje monstruoze të pronës publike. Tani zëvendësja dhe bashkëpunëtorja në vjedhje e Ramës deklaron se do jenë 200 hektarë. Belinda Balluku. Çdo njëri që merr përsipër të investojë, do i ketë paratë e humbura dhe do konsiderohet bashkëpunëtor në krim. Parlamenti ishte arenë solidariteti në këtë krim monstruoz. Por populli shqiptar do thotë fjalën e tij. Parlamenti mbrëmë, gjithçka u bë në errësirë.”

Pas përgënjeshtrimit nga vetë Komisioni Evropian të lukunisë së Edi Ramës se protesta e 6 Dhjetorit është antievropiane, Berisha e përshëndeti këtë qëndrim të KE ndërsa i bëri thirrje qytetarëve që në orën 12:00, para Kryeministrisë, të dalin të dëshmojnë vlerat tona, ditën kur BE zbarkon në Shqipëri për t’i dhënë fund Ballkanit të Hapur dhe vasalitetit të Ramës ndaj Serbisë.

“Siç keni ndjerë dhe konstatuar, protesta e 6 dhjetorit ka ngjallur një interes të jashtëzakonshëm në Shqipëri, emigracion, diasporë dhe kudo. Por, para se të adresoj thirrjen time, kam një falënderim të përzemërt për Komisionin Europian, përfaqësinë e tij, me deklaratën e djeshme, u dëshmuan shqiptarëve se ata vijnë këtu për mbështetjen e popullit shqiptar, vijnë këtu për mbështetjen e demokracisë në Shqipëri dhe natyrisht vijnë këtu, kanë përzgjedhur Tiranën edhe për qëllimet e tyre gjeostrategjike.

Thirrja dhe kërkesa që liritë e të drejtat e qytetarëve të respektohen, ishte përgjigjja më e shkëlqyer që morën Edi Rama dhe tellallët e tij, të cilët në reagimin e tyre të tmerruar nga protesta, të krijonin përshtypjen se në këtë vend, se në Tiranë nuk po mblidhen kryeministra dhe presidentë të vendeve të lira, të zgjedhur me votën e lirë, por po mblidheshin diktatorët e të gjithë botës. Kjo mori përgjigjen përfundimtare me deklaratën,” tha lideri i opozitës duke garantuar sigurinë e miqve që vijnë, respektin e hekurt dhe rigoroz të rregullave të mirëpritjes shqiptare.

“U bëj thirrje qytetarëve që të dalin për të dëshmuar vlerat tona, sikundër, garantoj dhe siguroj se PD vendosmërisht, përcaktohet për një tubim, i cili ka synim më madhor paraqitjen më dinjitoze dhe civile dhe ka në konsideratë të plotë garancinë e sigurisë së miqve që vijnë, respektin e hekurt dhe rigoroz të rregullave të mirëpritjes shqiptare. Ky është qëndrimi.

Ndërkohë thirrja ime është për çdo shqiptar, të dalin atë ditë të protestojnë, për të dëshmuar përkushtimin tonë jetik ndaj vlerave evropiane, vlera të cilat në këto 8 vite janë bjerrur, janë deformuar dhe deri diku zhdukur nga regjimi i narkoshtetit të Edi Ramës, që e kanë konsideruar Shqipërinë që feston 110-vjetorin e pavarësisë, 53 vende më poshtë se shteti i ri i pavarur i Kosovës në treguesit e zbatimit të ligjit dhe të drejtave të qytetarëve, por mjerisht edhe katër vende nën diktaturën moniste të Vietnamit.”

6 dhjetori, është e martë, është ditë pune, ora 12:00, por sakrifica ia vlen sepse është një rast për të shprehur me dinjiteti para lidershipit të BE, dhunimin e vlerave evropiane nga Edi Rama.

“Pikërisht është dhunimi i këtyre vlerave, absolutisht faktori më themelor i shndërrimit të shqiptarëve për herë të dytë në 30 vite në boat-people. Në njerëzit e gomoneve. Ju besoj se i patë statistikat e djeshme të qeverisë së Mbretërisë së Bashkuar. Shqiptarët tejkalonin me distancës sirianët dhe afganët. Është një rast për të shprehur me dinjiteti, me civilitet, zërin tuaj, para lidershipit të BE.”

Është e martë, është ditë pune, ora 12, por sakrifica ia vlen. Unë kam besim se do jenë të pranishëm. Ftoj nxënësit e shkollave që atë ditë t’ia kushtojnë të ardhmes së tyre evropiane, ftoj studentët e tyre nga mbarë vendi, të mblidhen në Tiranë. Është një rast unik, i papërsëritshëm, që ne të shprehim mbështetjen tonë të fuqishme për vlerat evropiane. Janë kaq në rrezik në Shqipëri.

Në fund, Kryetari i Partisë Demokratike e bëri të qartë se BE zbarkon në Shqipëri për t’i dhënë fund Ballkanit të Hapur.

“Për t’i dhënë projektit përçarës në Ballkan, zbarkon këtu lidershipi i Europës me flamurin e Procesit të Berlinit. Vijnë këtu 6 vende të Ballkanit Perëndimor, pra në njëfarë mënyre për të varrorus projektin serbo-rus të Ballkanit të Hapur, kaq shumë të reklamuar nga vasali i Vuçiçit dhe indirekt i Putinit.

Edi Rama, prej muajsh po bën në çdo samit, të Rusisë së vogël. Historikisht Serbia është vlerësuar dhe konsideruar si Rusia e vogël. Por kurrë ndonjëherë në histori, Serbia nuk ka dëshmuar më shumë se sot, se është një Rusi e vogël në Ballkan, duke mos respektuar sanksionet e vendosura nga BE dhe NATO ndaj Rusisë. Duke u shndërruar kështu në një prapavijë të rrezikshme për Ballkanin të Rusisë së Putinit. Edi Rama ka bërë haptaz avokatinë e Rusisë së vogël. Ka justifikuar, ka kërkuar që të tjerë ta mirëkuptojnë se pse Serbia nuk mund të respektojë sanksionet.

De facto ka respektuar politikën e Putinit ndaj Serbisë. Ndaj me këtë rast, me samitin e BE në Tiranë, merr një përgjigje fatale vasaliteti i tij ndaj Beogradit, indirekt ndaj Rusisë. Mbështetja që ai i bën hegjemonisë serbe dhe ndikimit rus në Ballkan,” tha Kryetari i Partisë Demokratike, Sali Berisha i cili pavarësisht përgjigjes se policisë, më 6 Dhjetor në orën 12:00, do të protestohet para Kryeministrisë:

“PD është parti e shtetit ligjor, ka njoftuar policinë. Kushtetuta e Shqipërisë dhe Gjykata Kushtetuese kanë vendosur, është krejtësisht i panevojshëm autorizimi i policisë. Ne kemi njoftuar. Cila është përgjigjia? Ajo që dikton Edi Rama, që bëri gjithçka dhe kujtoi se me këtë rast, do shfrytojë samitin për të shtypur liritë dhe të drejtat e popullit opozitar. Ne e parashikuam këtë dhe ndaj thirrëm protestën.”