Teatri Kombëtar/ Edi Rama, nuk do ta pres vendimin e Gjykatës Kushtetuese!

Në daljen publike të Kryeministrit Edi Rama, sot e pashmangshme ishte çështja e Teatrit Kombëtar, edhe pse ai tha se ajo duhej ezauruar para 20 viteve. Edi Rama e bëri të qartë se qëndrimi i tij mbetet i palëkundur dhe nuk e ka ndërmend ta pres vendimin e Gjykatës Kushtetuese por do ta shembë:

“Këto janë pjesa më e parëndësishme për ju, se merreni me gjëra shumë më të rëndësishme sesa ekonomia, arsimi, filloni me tërmetin tani Teatri Kombëtar?

Zhvillimet te Teatrit Kombëtar janë shumë të vjetra dhe më vjen sinqerisht edhe mirë edhe keq që vazhdon një debat për një temë që duhet të ishte ezauruar në këndvështrimin tim 20 vjet më parë. Ka shumë njerëz që ngatërrojë muret me historinë, historinë me nostalgjinë, por dua të them se së pari nëse ka një njeri po edhe një forca qeverisëse që në krahasim me gjithkënd tjetër nuk mund të akuzohet për mungesë vëmendje apo mungesë ndjeshmëri ndaj trashëgimisë kulturore janë unë dhe forca jonë qeverisëse. Mos harroni që kur unë kam nisur përpjekjen për të shpëtuar trashëgiminë kompleksi i ministrive ishte kompleks sipërfaqesh ku shkruheshin fjalë të pista me spraj, binin suvate, mbinin fiqtë mbi tarraca sepse mbeturinat liheshin dhe ktheheshin në pleh.

Godina e Teatrit Kombëtar nuk është çështje verbërie apo indiference, është realiteti, godinë e ndërtuar nga ushtria italiane me material të përkohshëm për argëtim pas pune, nuk ka qenë TK në planin italian, në planin e pas luftës, ka mbetur si ajo fjala, që një e përkohshme mbetet gjithë jetën si rezultat i pamundësive, është degraduar, i parikuperueshme edhe sikur të donim. Nëse do të kishte vlerë nga pikëpamja arkitektonike, e nëse do iu kishte hapësirat për të pasur teatër, nuk do restaurohej, por do të shembej dhe ndërtohet sipas projektit dhe ju them do na kushtonte më pak se godina e re nëse do të ndërtonim si është.”

Ndonëse nuk e ka mbajtur asnjërin prej premtimeve të dhëna, Edi Rama edhe sot u mundua të bindë opinioni se trualli i Teatrit Kombëtar nuk do të përdoret për zhvillim privat, kur tashmë dihet se e gjithë ngatërresa rreth Teatrit është bërë vetëm për përfitimet private, madje me emër dhe mbiemër:

“Asnjë centimetër i truallit nuk do të përdoret për zhvillim privat, ai vjen pas murit rrethues të Teatrit Kombëtar, nëse ne do ishim të interesuar për zhvillimin provat do të kishim të lehtë fare, do bënim kopjen e teatrit ekzistues, se ajo nuk restaurohet dot dhe ishim në rregull por pse do ta bënim këtë? Do paguante shumë më pak privati që do të merrte po atë sasi toke pas për të bërë zhvillimin tjetër, ndërkohë që ne kërkojmë shumë më tepër fond nga privati për ta këmbyer me një truall pas teatrit, ku ka ferra, mbeturina të ish dekorit dhe teneqe. 

Muze të kujt do ta bëjmë? Për çfarë, atë do të kemi brenda godinës së re të Teatrit Kombëtar, atëherë ku është çështja? është politike, mediokritet dhe kapu pas asgjësë për të bërë zhurmë, nuk kemi ne asnjë interes që të bëjmë zhurmë në rast se nuk kemi bindjen se e ardhmja ndërtohet sot dhe sot nuk mund të bëjmë diçka që mos ti ngelë të ardhmes. Nuk mund të jemi ne dakord me të gjithë, shumica është e qartë në këtë drejtim , e komunitetit teatror dhe publikut, një pjesë nuk janë dakord, nuk ishin dakord një pjesë edhe për stadiumin, ja ku jemi, më i bukuri i rajonit dhe një nga stadiumet e bukur të Europës.”

I pyetur se kur do ta prish Teatrin Kombëtar, Rama sqaroi:

“Procedura vazhdon, ka një ligj, ideja që një pakicë apo shumicë mund të dalë kundër ligjit duhet të marrë fund, të pëlqen s’të pëlqen ligji zbatohet nuk vihet në diskutim, nuk mendoj që një komunitet i caktuar edhe sikur të jenë të gjithë mund të marrë peng një institucion. Aty ka politikanë që luajnë teatër dhe aktorë që bëjnë politikë, nuk ka lidhje as me thelbin e çështjes as me përmbajtjen e argumentit, aty ka akuza, hamendësime, por jo argumente.”

Ndërsa sqaroi dhe pse qeveria nuk pret vendimin e Gjykatës Kushtetuese:

Nuk e presim dot tërmetin.