Tenisti serb Novak Gjokoviç diagnostifikohet me koronavirus

Kampioni botëror në tenis, Novak Gjokoviç, ka dalë pozitiv në testin e koronavirusit. Gjokoviç tha sot se gruaja e tij gjithashtu kishte dalë pozitive, ndërsa fëmijët e tij negativ ndërkohë shtoi se nuk ka simptoma të sëmundjes COVID-19, që e shkakton koronavirusi.

Njoftimi vjen pasi tre tenistë, Borna Çoriç i Kroacisë, Grigor Dimitrov nga Bullgaria dhe Viktor Troicki i Serbisë u testuan pozitivë, pasi luajtën në një turne me Gjokoviçin javën e kaluar.

Troicki tha se ai dhe gruaja e tij shtatzënë ishin të infektuar.

Duke komentuar mbajtjen e turneut në kohë të pandemisë, RFE raporton se Gjokoviç ishte arsyetuar me faktin se organizimi i tij kishte qëllim humanitar.

“Gjithçka e bëmë me një zemër të pastër dhe qëllime të sinqerta. Turneu ynë ishte i një karakteri humanitar me idenë për të ndihmuar tenistët nga rajoni, për t’u siguruar atyre kushte për të luajtur, për të gjeneruar të ardhura dhe në këtë mënyrë më lehtë të kapërcejnë këtë periudhë të vështirë,” tha Gjokoviç.