Tensionet në Veri, Ushtria Serbe në gatishmëri lufte i tregon dhëmbët Kosovës

Njësitet e Ushtrisë Serbe në kazermat Pazari i Ri dhe Rashkë janë në gatishmëri lufte. Kështu u shpreh sot ministri i Mbrojtjes i Serbisë, Nebojsha Stefanoviç gjatë vizitës në këto dy qytete ku me shefin e Shtabit të Përgjithshëm, Gjeneral Nënkolonel Millan Mojsilloviç, prezantuan gatishmërinë, siç u tha, për të përçuar mesazh të qartë se më nuk do të lejojnë dëbimin e popullit serb.

“Ushtria jonë nuk provokon, por është e gatshme që të mbroj popullin nëse ndodhë të cenohet jeta e tyre. E rëndësishme është të shoh se këta njerëz janë të gatshëm. Pajisjet dhe teknika me të cilën jemi furnizuar është në duart e profesionistëve,” tha ministri Stefanoviç duke vlerësuar se Presidenti i Serbisë, Aleksandar Vuçiç po bënë lëvizjet e duhura me qëllim të parandalimit të përshkallëzimit të situatës në veri të Kosovës.

Duke komentuar thirrjet e BE për të dyja palët që të përmbahen nga provokimet, Nebojsha Stefanoviç foli me gojën e Vuçiçit:

“Çfarë ka bërë Beogradi? Çdo provokim ishte nga ana e Prishtinës, kishit rastin ta shihni në Jarinje dhe Brnjak. Për fat të keq edhe rasti më i ri i rrahjes së serbëve. Gjithçka që po ndodhë tregon se sa kishte të drejtë presidenti kur foli se çfarë do të ndodhë. Se kjo është pjesë e një fushate të organizuar,” tha ministri i Mbrojtjes i Serbisë, Nebojsha Stefanoviç, i cili i tregoj sot dhëmbët Kosovës, por harron se në rast se ushtria serbe shkel në tokën kosovare, do të përballet me misionin ushtarak të NATO-s, KFOR, pavarësisht armëve dhe pajisjeve ushtarake që ka blerë shefi i tij, Aleksandar Vuçiç.

Ndryshe, pavarësisht se Serbia vazhdon me provokimet për të katërtën ditë me radhë, BE është angazhuar në zgjidhjen diplomatike të situatës së tensionuar që krijoi Aleksandar Vuçiç, si me transmetimin e mesazheve dhe spoteve ushtarake në mediave serbe që ka nën kontroll, ashtu dhe serbëve lokalë që vazhdojnë të barrikaduar të dehen dhe këndojnë këngë çetnike, ashtu siç vepruan në Kroaci dhe Bosnje Hercegovinë para masakrave të ushtrisë serbe.