Jo kundër SHBA, Flamur Noka: Kuvendi i PD do të mblidhet kundër Lulzim Bashës
“Kuvendi i Partisë Demokratike do të mblidhet, jo për të shqyrtuar ndonjë vendim të SHBA, por do të mblidhet kundër Lulzim Bashës, kundër kryetarit të PD që tani është minorancë, ilegjitim dhe nuk përfaqëson vullnetin e shumicës anëtarë të PD.” Kështu u shpreh sot Ish-Ministri i Brendshëm dhe deputeti aktual i PD, Flamur Noka, duke e bër të ditur se ja ka bërë të qartë sot kryetarit Lulzim Basha:
“Ta ketë parasysh se ky nuk do të jetë Kuvend kundër SHBA, por do të jetë Kuvend kundër tij. Gjithçka është një proces dhe askush në Republikën e Shqipërisë nuk mund të ndalojë vullnetin e anëtarëve të PD për t’u shprehur: zëri i çdo demokrati do të dëgjohet, vota e çdo demokrati do të dëgjohet,” tha Flamur Noka ndërsa sqaroi nëse po i bëhet presion krerëve të degëve të PD nga ana e Lulzim Bashës për të mos qenë të pranishëm në takimet e liderit historik Sali Berisha:
“Nga informacionet që kemi, ka disa ditë që ka filluar një tur takimesh me drejtues të degëve duke i thirrur këtu, duke i presionuar, duke u ushtruar shantazh për të mos hapur dyert për liderin historik të PD, për të bërë gjithçka për t’ia sabotuar takimet. Kjo nuk është thjesht e turpshme, kjo është e neveritshme. Kjo tregon edhe panikun që e ka zënë kryetarin nga lëvizja e demokratëve. Ai e di shumë mirë që nuk përfaqëson shumicën, nuk përfaqëson vullnetin e demokratëve, është një pakicë e pakonsiderueshme brenda PD.”
Ndërkohë për të gjithë ata që fërkojnë duart për këto zhvillime dhe trumbetojnë Partinë Demokratike që po shkon drejtë përplasjes, Flamur Noka “i qetësoi”:
“E para, asnjë përplasje, asnjë përçarje nuk do të ketë sepse shumica e demokratëve, shumica absolute janë kundër vullnetit të shprehur të kryetarit të partisë. Kjo ishte arsye që kryetari nuk guxoi të konsultohet me strukturat, të konsultohet me institucionet apo të marrë vendimmarrje në institucione, prandaj e mori natën dhe në mënyrë okulte, individualisht. Pra, nisma Foltorja, është ajo që po i bashkon demokratët. Ju po e shikoni, kudo Foltorja po i bashkon për një PD më të fortë, më të bashkuar, solide dhe fituese. Kjo parti që është sot nën drejtimin e z. Basha nuk është fituese. Demokratët kanë nevojë për një trupë drejtuese, për një lider, për një ekip që e çon drejt fitores dhe e bashkon, jo ai që i përçan,” tha deputeti i PD, Flamur Noka i cili mbështet “Foltoren” e organizuar nga lideri historik Sali Berisha dh enismën e tij për t’iu nënshtruar votimit në strukturat e partisë,vendimi i kryetarit të PD, Lulzim Basha, për përjashtimin e Berishës nga Grupi Parlamentar i Partisë Demokratike.
