Thaçi: Të bashkohemi ashtu siç bëmë 20 vjet më parë në Rambuje

Finalizimi i Konferencës së Rambujesë në Paris, 20 vjet më parë, ishte fitorja e parë diplomatike e Kosovës, e cila i hapi rrugë ndërhyrjes ushtarake të NATO-s për të parandaluar spastrimin etnik në Kosovë.

Kështu shprehet Presidenti i Kosovës, Hashim Thaçi, përmes rrjetit social Facebook, duke përkujtuar 20 vjetorin e finalizimit të konferencës së  Rambujesë.

“Kjo marrëveshje finalizoi procesin e çlirimit të Kosovës, i nisur nga sakrifica dhe lufta jonë. Ajo u shndërrua në testament për shpalljen e pavarësisë së Kosovës”.

Duke marrë shembull unifikimin e spektrit politik në Rambuje, Thaçi bëri thirrje për të ndjekur të njëjtin shembull për anëtarësimin e Kosovës në BE dhe organizata ndërkombëtare ndërsa përfundon:

“Bashkimi i spektrit politik në atë kohë dhe besimi i palëkundur te Shtetet e Bashkuara të Amerikës e bëri të mundur arritjen e kësaj marrëveshjeje pas negociatave të vështira dhe rraskapitëse. Sot, si 20 vjet më parë, duhet të bashkohemi të gjithë për të jetësuar ëndrrën e radhës – anëtarësimin e Kosovës në BE, NATO dhe OKB.”